مش هيكون عندنا أزمة جديدة في تراجع ايرادات قناة السويس والإيرادات هترجع تسجل ارقام قياسية.. والقناة هترجع مرة تانية تكون المصدر الأول للدولار في مصر... ياتري اية هيا الخطة دي والدولة بتستهدف منها كام.
خلال الأيام اللي فاتت الاقتصاد المصري تنفس الصعداء مرة تانية مع التوصل لاتفاق بين القوي المتصارعة في منطقة الشرق الأوسط لوقف إطلاق النار والعودة للمفاوضات اللي هتكون علي مراحل لحين التوصل إلي وقف دائم لاتفاق بوقف إطلاق النار، ولكن الاتفاق ده للاسف مستمرش لأكثر من شهر، والتوترات الجيوسياسية رجعت ترتفع مرة تانية وخصوصا في علي طول الممر الملاحي بالبحر الأحمر وبالتالي ايرادات قناة السويس واللي تراجعت باكثر من 70% خلال اكثر من 15 شهر فاتوا مرشحة للانخفاض من جديد بسبب تصاعد حده التوترات الجيوسياسية .
طيب اية اللي بيحصل في قناة السويس واللي بتعمله القناة علي تحافظ علي حركة الملاحة البحرية فيها؟.
بعد ما الجهود الدولية اللي قامت بيها مصر وقطر في التنسيق بين الأطراف المتصارعة للتوصل لصيغة لوقف إطلاق النار، الحكومة بدأت تعيد ترتيب اورقها لعودة حركة الملاحة الجوية علي طول مجري القناة وبدأت عمليات تعميق المجري الملاحي علشان يستوعب حركة السفن الكبيرة والعملاقة والحركة الملاحية الكبيرة اللي كانت متوقعة خصوصا مع استئناف حركة التجارة العالمية لحركتها الطبيعية بالمرور في البحر الأحمر بكل حرية وبدون اي تهديدات وده بعد شهور طويلة اغلب حركة التجارة العالمية كانت فيهم بيسلكوا طرق بديلة بسبب الضربات الجوية اللي كانت موجودة كل يوم علي السفن التجارية في المجري الملاحي بالبحر الأحمر.
مش كده بس لا ده كمان المسئولين عن القناة اتجهوا لتنويع مصادر دخلها، واعلنوا عن تقديم الخدمات الملاحية والبحرية للسفن المارة بالمجرى الملاحي كنوع من الحوافز اللي بتقدمها الدولة لاعادة جذب شركات الشحن العالمية للعبور من القناة مرة تانية، وفعلا الحكومة عقدت اتفاقيات مع كبريات الشركات العاليمة لبحث زيادة الخدمات الملاحية والبحرية للسفن المارة كنوع من انواع الخطط البديلة لزيادة الايرادات الدولارية للقناة، والعودة لتحقيق ارقام كبيرة، خصوصا أن قناة السويس بتعد المصدر الاول للدخل الدولاري لمصر من الخارج، واللي بسبب تراجع ايرادتها الحكومة واجهت ازمات اقتصادية كبيرة خلال الفترة اللي فاتت.
مش كده بس لا ده كمان خلال الفترة اللي فاتت الحكومة واصلت خطط أعمال الازدواج الكامل للمجرى الملاحي وده بهدف تعزيز قدرة القناة لاستيعاب كل أنواع الناقلات العالمية والعبور بكل سهولة وبدون ما يحصل اي عمليات شحوت هتؤدي لتوقف حركة الملاحة البحرية.
لازم نكون عارفين أن التوترات السياسية اللي موجودة في البحر الأحمر لها تاثير سلبي مباشر علي ايرادات مصر من قناة السويس وده اللي أكده الرئيس السيسي أن خسائر عائدات قناة السويس وصلت لـ 800 مليون دولار بسبب الاوضاع في المنطقة.
0 تعليق