يا ترى إيه قصة مشروع النقل الجماعي اللي هيعمل نقلة كبيرة في قطاع السياحة، هل هيقدم خدمة توصيل السياح للأماكن السياحية بسهولة، ولا هيكون فكرة مختلفة بتخدم على القطاع بطريقة غير مباشرة، طب إيه هي طبيعة المشروع ده ومكاسبه الاقتصادية.
في الفترة الأخيرة، وزارة النقل نفذت مشروع ضخم على الطريق الدائري حول القاهرة الكبرى، وهو مشروع الأتوبيس الترددي BRT، اللي مش بس هيقدم خدمة نقل الركاب في الـ3 محافظات، لأ ده كمان هيخدم على السياحة وتحديدًا المتحف المصري الكبير.
وحاليًا، تم الانتهاء من المرحلة الأولى من مشروع الأتوبيس الترددي BRT، واللي بتوصل عدد محطاته لـ14 محطة، هي: ( محطة عدلي منصور "محطة غير نمطية " - عدد 2 محطة سطحية بكوبري مشاه " بهتيم واكاديمية الشرطة " – عدد 11 محطة سطحية بنفق مشاه "(إسكندرية الزراعي و الشرقاوية و شبرا بنها و مسطرد والخصوص والمرج و القلج ومؤسسة الزكاة، والفريق إبراهيم العرابي و السلام وطريق السويس" ) وده من اجمالي عدد محطات المشروع بالكامل بمراحله الثلاثة واللي هي 48 محطة.
كمان، الأتوبيس الترددي هيبط بين محطات المشروع والمواقف الموجودة أسفل الطريق الدائري، ودي اللي هتخدم القادمين من وإلى الطريق الدائري، وهيوفر أماكن الانتظار داخل المحطات، وهيسهل وصول الراكب للقطار الكهربائي الخفيف LRT والخط الثالث للمترو وخط سكة حديد عدلي منصور السويس وموقف أتوبيسات السوبرجيت.
ومقرر إن يتم تشغيل 100 اتوبيس كهربائي، وكل أتوبيس هتوصل سعته لـ 66 راكب بما يعادل (5 ميكروباص )، عشان ينقل 3200 راكب بالساعة في الاتجاهين، وتم إنتاج الاتوبيسات دي محليًا في مصر وده تم تنفيذًا لتوجيهات الرئيس عبدالفتاح السيسي بالعمل على توطين مختلف الصناعات في مصر ومنها صناعة الأتوبيسات، وعدم استيراد أي اتوبيسات من الخارج، وده بيحصل في إطار الخطة الشاملة للنهوض بقطاع الصناعة بهدف تحويل مصر لمركز صناعي إقليمي.
ومن ضمن المكاسب الاقتصادية للأتوبيس الترددي، إنه هيخدم على السياحة وهيقدر ينقل السياح للمتحف المصري الكبير، وكمان هيربط مع الخط الرابع للمترو عشان يسهل أي رحلة سياحية داخل القاهرة، كمان، هيتم الاستغلال الأمثل للمساحات أسفل الكباري واستغلالها في انشاء مواقف للميكروباص ومناطق انتظار لخدمة الاتوبيس الترددي BRT وكذلك الاستغلال الاستثماري الأمثل لمحطات الـ BRT .
0 تعليق