الحكومة في الوقت الحالي بتحاول تطور الخدمات اللي بتقدمها للمواطنين واحدة من الخدمات دي هيا خدمات الاتصالات والإنترنت.. والحكومة حاليا بتستعد لطرح الجيل الخامس.. يا تري دي هيكون امتي.. وايه فايدتها للاقتصاد المصري؟
التحول الرقمي واحد من اهم الملفات اللي موجودة علي مكتب الحكومة في الفترة الرئاسية الجديدة، وطبعا علشان يحصل ده لازم يكون عندها جيل متقدم من شبكات الاتصالات والانترنت في مصر، وده اللي بيحصل حاليا خصوصا أن الحكومة شغالة وبكل قوة علي خطة إطلاق الجيل الخامس من شبكات المحمول في مصر واللي هيكون نقله كبيرة في عالم الاتصالات في مصر وهيوفر سرعة عالية في استخدام الانترنت وهتنهي تماما أزمات الإنترنت في مصر .
طيب امتي الحكومة هتعلن عن إطلاق الجيل الخامس من شبكات المحمول في مصر؟
السؤال ده جاوب عليه وزير الاتصالات وتكنولوجيا المعلومات واللي قال أن الحكومة هتطلق الجيل الخامس من شبكات المحمول في مصر في النصف التاني من 2025، كخطوة بتهدف بتعزيز جودة خدمات الاتصالات ودعم متطلبات التحول الرقمي في مختلف القطاعات، خصوصا أن تكنولوجيا الجيل الخامس هتوفر سرعات إنترنت أعلى وزمن استجابة أقل، وده هيكون له اثر كويس في تحسين تجربة المستخدمين ده غير أنه هيدعم التطبيقات الحديثة زي الذكاء الاصطناعي والمدن الذكية.
وعلشان الدولة تكون مستعدة لإطلاق الجيل الجديدة من شبكات الهاتف المحمول فالحكومة بتعمل تنسيق حاليا مع شركات الاتصالات الأربعة الموجودين في مصر لضمان جاهزية البنية التحتية لاستيعاب التقنية الجديدة، والخدمة الجديدة هتعزز قدرة مصر التنافسية في قطاع الاتصالات وتكنولوجيا المعلومات.
وفي الفترة اللي فاتت الجهاز القومي لتنظيم الاتصالات أعلن عن أصدار تراخيص الجيل الخامس للمحمول، 5G لشركات المحمول العاملة في السوق المصري بقيمة 150 مليون دولار للرخصة الواحدة، واشترط أن الخدمة تتقدم للعملاء خلل 6 شهور من الحصول على الترخيص، وهتوصل سرعات التحميل عليها من 10 إلي 20 جيجابت في الثانية.
أما بقي الناس اللي بتسال علي الفايدة اللي بتعود علي مصر من الجيل الجديد من الشبكات فهيا هتساعد في ترتيب مصر بالمؤشرات الدولية فى قطاع الاتصالات وتكنولوجيا المعلومات ، وهيكون له تاثير قوي في تحقيق التحول الرقمى خصوصا أن شبكات الجيل الخامس هتيح سرعات فائقة للتحول الرقمى.
0 تعليق