تخيل تصحى الصبح.. تمسك موبايلك.. تفتح تطبيق البنك كده على السريع.. فجأة تلاقي حاجة غريبة: رصيدك ناقص، أو في عملية خصم أنت ما عملتهاش، أو الأسوأ.. الحساب فاضي! أول سؤال يخطر في بالك: "إيه اللي حصل؟ وأنا المفروض أعمل إيه دلوقتي؟"
مشاكل الحسابات البنكية ممكن تحصل لأي حد، وفي أي وقت. مرات بتكون حاجات بسيطة زي إن البطاقة البنكية مش شغالة، أو الماكينة رفضت تسحب منها. ومرات تانية بيكون الموضوع أكبر: خصم غير مبرر.. حركة مالية أنت ما عملتهاش.. أو الحساب اتجمد فجأة من غير إنذار
طيب.. تتصرف إزاي؟
الأهم هنا إنك ما تتوترش.. لأن في خطوات سهلة وواضحة تقدر تمشي عليها علشان تحل المشكلة وتحافظ على فلوسك.
أول خطوة: اتصل بخدمة العملاء.. قبل ما تروح البنك وتضيع وقتك في الطوابير، اتصل على خدمة العملاء.. وكل بنك في مصر عنده رقم مخصص شغال 24 ساعة لحالات زي دي.
مثلاً:
البنك الأهلي المصري: 19623
بنك مصر: 19888
CIB: 19666
وأي بنك تاني هتلاقي رقمه بسهولة على موقعه أو من خلال تطبيقه.. لما تكلمهم، خليك واضح ومباشر.. قل لهم: "في مبلغ اتخصم من حسابي يوم كذا.. ومش عارف ليه" أو "البطاقة مش بتشتغل ومفيش سبب واضح" .. أو "الحساب اتجمد فجأة وعايز أعرف السبب".
في حالات كتير.. المشكلة بتتحل في نفس المكالمة، خاصة لو كانت حاجة فنية أو بسيطة.
طب لو المشكلة ما اتحلتش اعمل إيه؟
لو خدمة العملاء قالوا لك إن لازم تروح الفرع.. يبقى لازم تجهز نفسك صح .. شوف أقرب فرع ليك على خريطة التطبيق أو الموقع.. اتأكد من مواعيد العمل وخد معاك بطاقتك الشخصية وأي أوراق تثبت المشكلة زي كشف حساب يظهر فيه الخصم أو صورة من التطبيق توضح الخطأ أو اي إيصالات أو رسائل SMS لو في حاجة مهمة.
ولما توصل الفرع.. اتكلم مع الموظف المختص، ووضح له كل التفاصيل.. ولو حسيت إن الموضوع أكبر من الموظف اللي بتتعامل معاه.. من حقك تطلب تقابل مدير الفرع دي فلوسك، ومن حقك تعرف إيه اللي حصل وتحصل على حل واضح وسريع.
اللى لازم تكون عارفه ومتأكد منه ان مافيش مشكلة في البنك ملهاش حل.. بس لازم تتصرف بهدوء وتبدأ بالخطوات الصح.
التليفون أول سلاحك.. والمستندات دليل قوتك.. والمتابعة هي طريقك عشان حقوقك ترجعلك كاملة.
0 تعليق