إزاي تختار البنك الصح ليك؟.. لو فكرت تفتح حساب بنكي أو حتى تغير البنك بتاعك في شوية حاجات لازم تعرفها قبل ما تاخد القرار.. التقرير ده هيوضح لك كل حاجة.
قبل ما تبدأ، اسأل نفسك السؤال ده: ليه هتفتح حساب؟ هل أنت عايز حساب توفير عشان تدّخر كل شهر؟ ولا محتاج حساب جاري عشان مرتبك يتحول عليه؟ ولا ممكن تكون بتفكر في قرض لشراء عربية أو جهاز جديد؟ لازم تعرف الهدف عشان تقدر تختار البنك اللي يحقق لك احتياجاتك بالشكل الأمثل.
فيه بنوك بتقدم لك عروض جذابة.. زي الكاش باك على استخدام البطاقة البنكية.. يعني لو اشتريت حاجة بـ 1000 جنيه، ممكن يرجع لك 50 جنيه. وكمان فيه بنوك تديك فوايد مرتفعة على التوفير، زي لو حطيت 10 آلاف جنيه، هتحصل على فايدة 10% أو أكتر سنويًا.. بس خلي بالك، الفوايد دي مش ثابتة لازم تقرأ الشروط كويس لأن في بعض الأحيان الفايدة بتبقى مرتبطة بشروط معينة زي وجود حد أدنى للحساب. لو الحساب نزل عنه، الفايدة بتروح.
وفيه بنوك بتاخد منك مصاريف إدارية شهريًا، وفيه بنوك بتقول لك "افتح الحساب ببلاش"، لكن لما تيجي تسحب من ATM بنك تاني، هتلاقي العمولة عالية جدًا لدرجة إنك تحس إنك بتدفع ضريبة! مهم إنك تسأل عن المصاريف بوضوح: كام مصاريف فتح الحساب؟ كام العمولة على السحب والتحويل؟ وإذا كنت بتحب تستخدم الموبايل بانكنج، جرب التطبيق وشوف إذا كان سهل وبدون مشاكل.
من الحاجات المهمة اللى لازم تفكر فيها هي مستوى الخدمة.. هل هتقدر تتواصل مع البنك بسهولة.. وهل البنك ده عنده خدمة عملاء متميزة؟ لو ضاع منك كارت أو اتسرق منك، هل هتقدر تتواصل معهم بسرعة؟ فيه بنوك بتقدم خدمة ممتازة، متاحة 24 ساعة، وفيه بنوك تانية تحس إنك بتدق الباب المغلق! جرب تروح فرع البنك القريب منك، أو اسأل الأصدقاء عن تجاربهم مع خدمة العملاء
ولو بتفكر في الاستثمار فالبنك اللي تختاره لازم يقدم لك خيارات متنوعة زي شهادات الادخار أو حسابات التوفير اللي تمنحك عوائد ثابتة أو متغيرة. لازم تسأل وتفهم العوائد بشكل جيد، علشان تقدر تستثمر أموالك في المكان الأنسب.
في النهاية.. الاختيار بين البنوك مش بس عن الفوائد أو العروض.. لكن كمان عن راحة بالك والخدمات اللي بتدعمك في كل وقت خد وقتك وابحث كويس عشان تختار البنك اللي يناسبك وتحقق أهدافك المالية بذكاء.
0 تعليق