الناس كلها بتسأل، يا ترى بعد ما البنك المركزي خفض الفايدة، نعمل إيه في فلوسنا؟ نحطها فين؟ نركنها في البيت؟ ولا ندور على شهادة كويسة؟.. عشان كده هنقولك في التقرير ده على أعلى 5 شهادات ادخار موجودة حاليا في البنوك، وكمان أنهى شهادة بتدي عائد محترم؟ وأنهي الأحسن في دورية الصرف؟ وأهم سؤال إيه أفصل اختيار؟ 

نبدأ من قرار البنك المركزي المصري بخفض سعر الفايدة الأساسي، وده خلى البنوك كلها تراجع شهاداتها وتخفض العوائد اللي كانت موجودة، خصوصًا بعد وقف شهادة 27% الشهيرة.

فاللي حصل إن أغلب الناس اللي كانوا شاريين الشهادات دي أو ناويين يشتروا، بقوا محتارين، طيب فين نروح دلوقتي؟ مين بيدي أكتر؟ وهل العائد ثابت ولا متغير؟

خلينا نبدأ من الكبار، وهي الشهادة البلاتينية بعائد متغير، من البنك الأهلي المصري، لأن العائد السنوي بتاعها 25.25%، دورية الصرف كل 3 شهور، ومدتها 3 سنين، وكانت 27.5% قبل كده بس اتخفضت بعد قرار المركزي.

يعني لو معاك مبلغ محترم وعايز تستفيد من الفايدة الكبيرة نسبيًا، دي لسه من أعلى الشهادات اللي موجودة، بس العائد متغير، يعني ممكن ينزل لو الفايدة نزلت تاني.

رقم 2 هي شهادة ابن مصر بعائد متدرج، من بنك مصر، وهي شهادة سنوية، العائد في السنة الأولى 28%، وفي السنة التانية 23%، وكمان في السنة التالتة 18%، وهتا دورية الصرف بتكون سنوي، والحد الأدنى للشهادة 1000 جنيه.

ونقدر نقول إن دي أعلى عائد ثابت في السنة الأولى موجود حاليا في السوق، وده بيغري ناس كتير إنها تحط فلوسها وتاخد فايدة تقيلة أول سنة، خصوصا لو مش فارق معاهم الانتظام الشهري.

رقم 3 هي شهادة ابن مصر من بنك مصر، بعائد متدرج شهري، والعائد فقيالسنة الأولى 24٪ؤ وفي السنة التانية 20%، والتالتة 16%، والصرف بيكون  شهري، أما الحد الأدنى لفتحها هو 1000 جنيه.

والشهادة دي مناسبة للي محتاج ياخد مبلغ شهري ثابت يصرف منه على بيته أو احتياجاته، ومش حابب يستنى سنة كاملة عشان يقبض.

رقم 4 هي الشهادة البلاتينية الثابتة، من البنك الأهلي المصري، والعائد بتاعها بيكون 19.5، والصرف شهري
بس مدتها 3 سنين، وكانت 21.5% قبل كده

وحاليا، ناس كتير بتميل للشهادات الثابتة لأنها بتديك أمان إن الفايدة مش هتقل مهما حصل، بس العائد هنا أقل من المتغير أو المتدرج، لأنك واخد أمان أكتر.

رقم 5 بقى هي شهادة القمة من بنك مصر، وهنا  العائد بتاعها بيكون 19.5%، أما الصرق فشهري ومدتها  3 سنين.

ودي نفس فكرة الشهادة البلاتينية الثابتة بس في بنك مصر، وهي مناسبة لو إنت بتتعامل مع بنك مصر وعايز تفضل هناك.

أما بقى لو معاك مبلغ مش كبير وعايز شهادة كويسة، ممكن تبص على شهادة أمان المصريين من بنك مصر، لأنها بتبدأ من 500 جنيه ومضاعفاتها، والعائد بتاعها 13٪، ومدتها 3 سنين، وكمان ممكن تكسب كمان تغطية تأمينية عليها.

طيب أختار إيه؟

ده بقى حسب حالتك، يعني لو إنت مش محتاج الفلوس لمدة 3 سنين وعايز أعلى عائد ثابت أول سنة فممكن تختار "ابن مصر – السنوي"، أما لو محتاج مبلغ شهري يصرف عليك أو يساعدك فالحل في شهادة "ابن مصر المتدرج الشهري" أو شهادة "القمة".

وأخيرا، لو معاك مبلغ كبير ومش فارق معاك التذبذب في الفايدة، قاختا"الشهادة المتغيرة من البنك الأهلي، ولو بتحب الأمان وتنام وانت مطمن فهنا بتفوز "الشهادة الثابتة من البنك الأهلي أو بنك مصر.

في الآخر، الموضوع بسيط، بس محتاج شوية تفكير. كل شهادة ليها مزايا وعيوب، وانت الأهم تختار اللي يناسبك انت شخصيا.