عبرت الفنانة جوري بكر عن سعادتها الكبيرة بالمشاركة القوية التي حققتها في موسم دراما رمضان 2025، بعد أن شاركت في ثلاثة أعمال دفعة واحدة، وهي، شباب امرأة، والمداح أسطورة العودة، وسيد الناس.

وأوضحت جوري في تصريحات لها أن الضغط كان شديدًا عليها خلال فترة التصوير، قائلة، وصلت لمرحلة من الإرهاق خلتني أتعرض لانهيار عصبي، كنت بصور في 3 أماكن مختلفة في وقت واحد ومش بنام تقريبًا.

لكن كان عندي إصرار أظهر بشكل مختلف في كل شخصية، ومش أبقى محصورة في نوع واحد من الأدوار، والحمد لله النجاح جالي من التلاتة.

وعن كواليس مسلسل المداح أسطورة العودة، نفت جوري ما تردد عن وجود ظواهر غريبة أثناء التصوير، مشيرة إلى أن الأجواء كانت طبيعية.

وقالت، الكلام ده مش حقيقي، إحنا كنا شغالين عادي، ومافيش حاجة تخوف، بس أوقات بتحصل حاجات بسيطة زي حاجة تتحرك من مكانها، أو حاجة تتكسر فجأة، بس مش أكتر من كده.

وأضافت، كنا حريصين دايمًا على قراءة القرآن والصلاة قبل التصوير، وده كان بيخلينا نحس براحة وطاقة إيجابية، وإن شاء الله أشارك في الجزء السادس لو اتنفذ.

وفي ختام حديثها، أعربت جوري عن تمنياتها بعودة الفنان محمد رمضان للساحة الفنية بقوة، وقالت، محمد رمضان من أكتر الفنانين اللي استمتعت بالشغل معاهم، وإن شاء الله يرجع أقوى، لأنه فنان ليه جمهوره ومكانته.