بتسمع كتير عن أزمة الدولار.. عن إن الاقتصاد واقف والمستقبل غامض.. طب فكرت مرة تسأل نفسك: هل الكلام ده فعلاً حقيقي؟ هل إحنا فعلاً بنعاني من نقص في العملة الصعبة؟ ولا في حاجات بتحصل في الكواليس محدش بيقولك عليها؟

ناس كتير طول الفترة اللى فاتت كانت بتروج لكلام مش حقيقي عن أزمة دولار بتعيشها مصر وان البنوك مش يتلبى طلبات الشركات والمستوردين وكانوا كمان بيروجوا ان اقتصاد مصر رايحة فى حتة صعبة

طب ليه بنقول ان ده كلام مش حقيقي؟

بص يا سيدي مصر فى اخر سنة دخلها أكتر من 46 مليار دولار استثمارات أجنبية مباشرة ودي أرقام حقيقية وموثقة وتعالوا نغوص مع بعض أكتر فى التفاصيل ونفهم إيه اللي بيحصل؟ وليه الصورة مش بالسوداوية اللي البعض بيحاول يصدرها؟

"البنك المركزي المصري أعلن قريب جدا إن صافي تدفقات الاستثمار الأجنبي المباشر في مصر وصل لـ46.1 مليار دولار بنهاية السنة المالية 2023-2024. وده رقم قياسي مقارنة بأي سنة تانية

لكن السؤال هو: إزاي وصلنا للرقم ده؟

خلينا نبص على شوية نقاط..  أولاً مصر قدرت تقدم نفسها كوجهة استثمارية مميزة مش بس على مستوى المنطقة لكن كمان على مستوى القارة الأفريقية كلها.. وعلى مدار سنتين ورا بعض مصر حافظت على صدارة قائمة المقاصد الأفريقية الجاذبة للاستثمار. وده مش صدفة... ده نتيجة خطة واضحة واستراتيجية مدروسة

ةخلينا نركز على القطاعات اللي بتسحب الاستثمارات دي. عندنا القطاع العقاري اللي لوحده بيشكل حوالي 20% من الناتج المحلي.. القطاع ده مش بس بيحرك السوق، ده بيخلق أكتر من 7 مليون فرصة عمل مباشرة وغير مباشرة، وبيشغل أكتر من 100 صناعة مرتبطة.. وده اللي أكده المهندس أحمد صبور لما قال إن المستثمر دلوقتي بقى محور اهتمام العالم كله لأنه بيخلق قيمة حقيقية. ده بالإضافة لقطاعات تانية زي السياحة اللي سجلت إيرادات 14.4 مليار دولار، وقناة السويس رغم انخفاض إيراداتها وصلت لـ6.6 مليار دولار..ودي  كلها مصادر بتدعم الاقتصاد الوطني

طيب... ليه كل التركيز على الاستثمارات الأجنبية؟

ببساطة لأن المستثمر الأجنبي مش بس بيجيب عملة صعبة.. ده كمان بيخلق فرص عمل، وبينقل التكنولوجيا، وبيزود الإنتاج المحلي.. وخلينا نفتكر إن الحكومة عندها خطة طموحة لجذب حوالي 240 مليار دولار من القطاع الخاص خلال الست سنين الجاية.. مع البنية التحتية اللي اتطورت بشكل غير مسبوق خلال العشر سنين الأخيرة مصر دلوقتي في موقف يسمح ليها إنها تكون مركز إقليمي للصناعة والتجارة.

لكن، خلينا نكون واقعيين... مفيش نجاح بيجي من غير تحديات,. واحد من أكبر التحديات اللي بتواجه الاقتصاد المصري هو توفير التمويل.. وده اللي بيخلي القطاع العقاري، مثلاً، يواجه صعوبات بس برضه لازم نفتكر إن الدولة شغالة على حلول مبتكرة زي تعزيز دور المؤسسات المالية غير المصرفية اللي بتساعد بشكل كبير في توفير روافد تمويلية جديدة

خلاصة الكلام اللى يقولك مصر عندها أزمة فى الدولار قولوا .. مصر دخلها فى سنة واحدة أكتر من 46.1 مليار دولار استثمارات أجنبية مباشرة..و لازم نفتكر إن ده مش رقم وخلاص.. ده انعكاس لجهد كبير اتعمل علشان نقدر ننافس على مستوى عالمي..و الاقتصاد المصري قدام فرصة حقيقية علشان يكمل في طريق النمو ومع كل الأرقام دي واضح جدًا إن اللي جاي أحسن. فخليك دايمًا واثق إن الصورة مش سوداوية، وفي أمل كبير والأرقام اللي بتقول كده مش أنا ولا انت ولا أى حد تاني