كشفت الإعلامية سالي عبدالسلام، عن فقدانها ابنتيها، عبر حسابها الشخصي على موقع تبادل الصور والفيديوهات الشهير "إنستجرام". وكتبت سالي عبدالسلام، قائلة :"قدر الله وما شاء فعل من كام يوم، وده بعد سنتين انتظار التؤام اللي كان نفسى فيهم أوي يارب، سنتين صبر وأنت مفيش قدامك غير الصبر زي أى رزق والحمد لله إن اختباري كان في الصبر و بس مش أكتر".

وتابعت سالي عبدالسلام، قائلة:"كنت طالباها تيجي من عند ربنا خالص ومن غير تدخل دكاترة، الحمد لله على نعمة الأخذ بعد العطاء، يارب أغلى ماليا، واللي كان هيكون ليا، الحمد لله قدري الحمد لله".

وأضافت سالي عبدالسلام، قائلة :"أنا بكتب الكلام ده عشان يمكن حد يتعلم!!!، كل حد قالي وقال عليا مش عايزة تخلف عشان خايفة على جسمها و شغلها، وكانت أوحش حاجة سمعتها في حياتي، وهم لا يعلمون شيئاً".

واستكملت سالي عبدالسلام، قائلة :"عشان كل حد بيضغط على اللي قدامه وفاكر إنه حقه وده لا يحق له عشان المفروض انه قريب أو معتبر نفسه كدة ومش من أهله أصلاً ولا يحق له و يحسسهم إن وراهم تارجت يا إما هيكون منبوذ منهم وهنسود عيشتك بسؤالنا كل شهر و نضغط عليك مع إنهم مش هيشيلوا أصلا ومحدش هيشيل غيرك، وهم لا يعلمون شيئاً".

وأردفت سالي عبدالسلام، قائلة :"اوعي تقولى إنك حامل وخافي من العين وأي كلام فى الموضوع ده بالذات !!!، أهه مقولتش وبرضه محصلش ومع احترامى ليهم العرسة بتخلف ده مش إنجاز، وهم لا يعلمون شيئاً".

وأكملت سالي عبدالسلام، قائلة :"عشان كل ست أوعي تبقى بـ 100 ست و تشيلي مسؤولية كل حاجة لوحدك "لوحدك".. الست الجدعة بجد مبتاخدش حاجة، الست الجدعة محدش بيساعدها و كله بيرمى عليها وكمان لما منعرفش نبقى زيها نعطلها أو نقلل منها وبمعنى أصح نبقى سبب فى سقوط كل حاجة فيها مش أطفالها بس ! يا ريتنى قولت مبعرفش أو مش هقدر عشان موصلش لكدة!، وهم لا يعلمون شيئاً".

واختتمت سالي عبدالسلام، قائلة :"كلنا تعبنا و بنتعب ومحدش بيحس ومحدش طلب منك تحس، بس الرحمة، الرحمة كل اللى كتبت عنهم بيني و بينكم الله، إنا لله وإنا إليه راجعون، أدعولى كتير، راضية والحمد لله، بس بنهار وأنا بصلي ومش بطلب غير الثبات من ربنا، بس ليا بيتين في الجنة، اخترت الأخرة و الأبقى يا الله".