مين فينا مش بيسأل نفسه دلوقتي سعر الدهب راح فين؟ يا ترى الاسعار هترتفع زي ما معظم التوقعات بتقول ولا ممكن تحصل مفاجأة والدهب ينخفض ؟ وهل ده الوقت المناسب عشان تشتري دهب؟ ولا الأفضل تستنى شوبة؟
فيه أسئلة كتير بتدور في دماغنا كلنا عن الدهب خصوصًا مع التقلبات اللي بنشوفها في الأسعار الفترة الأخيرة فى سوق الصاغة.. طب تعالوا نفهم سوا إيه اللي بيحصل في سوق الدهب فى مصر ، وإيه التوقعات المستقبلية.
زي ما كلنا عارفين، الدهب بيعتبر ملاذ آمن لكتير من الناس خصوصًا في أوقات الأزمات الاقتصادية والتضخم .. بس هل ده معناه إن سعره هيفضل يزيد طول الوقت؟
علشان نجاوب على السؤال ده، لازم نفهم العوامل اللي بتأثر على سعر الدهب.. وده هيكون المفتاح لمعرفة اى حاجة تخص مستقبل الدهب .. و أهم عامل بيأثر على سعر المعدن النفيس هو سعر الدولار وكل ما الدولار زاد قيمته كل ما سعر الدهب زاد لأن ده بينعكس يشكل واضح على السعر الاجمالي اللى بيتقيم بناء على سعر الورقة الخضرا
كمان من الحاجات المؤثرة فى الدهب هي أسعار الفايدة اللي بتلعب دور مهم جدا فى تحديد سعره و لما الفايدة بتزيد الناس بتفضل تستثمر فلوسها في البنوك وتشترى شهادات او أذون خزانة بدل ما تشتري دهب وبالتالي بيقل الطلب على المعدن الأصفر ومعاه طبعا بتنخفض الأسعار وده حصل اكتر من مرة طول ال 3 سنين اللى فاتوا
طب إيه التوقعات المستقبلية لسعر الدهب في مصر؟
المتخصصين بيقولوا إن الموضوع مش سهل، ومتأثر بعوامل كتير فيه توقعات بتقول إن سعر الدهب هيستمر في الزيادة خصوصًا مع التضخم المتزايد وعدم الاستقرار الاقتصادي في العالم وكمان مع اتجاه الفيدرالى الامريكي لتخفيف سياسته فى التعامل مع التضخم من خلال خفض اسعار الفايدة
وفي توقعات تانية بتقول إن السعر هيستقر أو حتى ممكن ينخفض شويه لو الاقتصاد المصري تحسن والوضع فى الشرق الأوسط استقر شوية الفترة الجاية.
طب اللى بيتوقعوا ارتفاع اسعار الدهب بيقولوا الاسعار هتروح فين؟
فيه ناس كتير شايفة ان الدهب عالميا هيوصل لـ 2800 دولار للأونصة في نهاية 2024، و3300 دولار في 2025.. وده معناه إن سعر الدهب في مصر ممكن يزيد بشكل كبير بس ده مش مضمون، لأن زي ما قلنا، سعر الدهب بيتأثر بعوامل كتير معظمها متغير
ووفقا لبعض الخبراء أسعار الدهب في مصر بتتغير باستمرار بسبب التغيرات في سعر الدولار والطلب على الدهب.. لكنهم فى نفس الوقت بيقولوا ان التوترات الجيوسياسية ممكن تخلي الناس تلجأ للدهب كملاذ آمن وبالتالي تزيد الأسعار بشكل كبير الفترة الجاية
أهم حاجة لازم تعرفها إن التنبؤ بأسعار الدهب مش سهل، وممكن تتغير التوقعات في أي وقت.. عشان كده لازم تتابع الأخبار الاقتصادية باستمرار وتاخد قرارك بناءً على معلومات موثوقة..و لو بتفكر تشتري دهب، حاول تستشير خبير مالي، أو حد فاهم في الموضوع ده، عشان يساعدك تاخد القرار المناسب.. وماتنساش إن الاستثمار في الدهب لازم يكون جزء من خطة استثمارية متكاملة، مش كل فلوسك تحطها فى الدهب حاول تنوع محفظتك الاستثمارية
في النهاية سعر الدهب هيفضل موضوع مثير للاهتمام وهنفضل نتابعه بكل تركيز.. المهم إنك تاخد قرارك بوعي كامل، وماتعتمدش على الشائعات والأخبار المغلوطة."
0 تعليق