مع قرب انتهاء سنة 2024 وبداية سنة جديدة، خبراء الاقتصاد بيتكلموا عن توقعات النمو وأسعار العملات والدهب، واللي بتبقى غالبا معيار أو مقياس لاقتصاد أي دولة، ومع بداية سنة 2025 الخبراء أكدوا أن سعر الدهب هيروح في حتة تانية خالص، طب يا ترى هيحصل إيه.. هنقولك كل التفاصيل في الفيديو ده فتابعنا للآخر. 
 

طبعا الدهب بيعتبر الملاذ الآمن للادخار أو الاستثمار، بمعنى إنك لو مواطن عادي ومعاك فلوس عايز تدخرها فأول حاجة بتفكر فيها إنك تشتري دهب عشان تحافظ على تحويشتك وتطمن إنها تزيد مش فلوسك بتفقد قيمتها، أما البنوك العالمية وبينهم البنك المركزي المصري فبتشتري دهب عشان تحوط نفسها كويس في حالة حدوث أي أزمات ممكن تأثر على اقتصاد البلد، فبالتالي بتكون عندها رصيد دهب محترم تحصن نفسها بيه كويس ضد الأزمات، ومعروف كمان إن الدهب هو الاستثمار الأكثر ربحية بين مختلف أوجه الاستثمار عالميا في الفترة الأخيرة.

طب يا ترى إيه هي توقعات أسعار الذهب في نهاية السنة دي 2024 وبداية 2025؟

بص يا سيدي، دلوقتي أسعار الدهب تخطت كل التوقعات، ولكن متوقع إن سعر الأوقية يتراوح ما بين 2700 و3000 دولار للأوقية خلال الربع الأخير من السنة دي، يعني الثلاثة أشهر الأخيرة من 2024، عشان يسجل سعر الذهب عالميا مستوى تاريخي جديد وغير مسبوق، ولكن الكلام ده مجرد تكنهات بس بتستند للارتفاعات القياسية الأخيرة وتوترات المنطقة وتصاعد حدتها، خاصة وأن الدول المصدرة للنفط ترتكز غالبيتها في منطقة الشرق الأوسط.

ونقدر نقول إن سعر الدهب العالمي بيتقيم بالدولار الأمريكي، وده لأن العملة الخضرا هي الوحيدة اللي مازالت مرتبطة الدهب، والسبب هو اتفاقية بريتون وودز، عشان كده سجل سعر أوقية الذهب عالمية وفقا لآخر تحديث حوالي 2661 دولارا، زي ما أعلنت البورصات العالمية للمعدن الأصفر.

طب إيه هي مزايا الاستثمار في الدهب؟

بص يا سيدي،  بنوك الاستثمار العالمية بتوصي دايما بشراء الدههب والاستثمار فيه وده لعدة أسباب؛ أولها إنخ مربح على المدى الطويل، وملاذ آمن للمستثمرين، وأداة تحوط من التقلبات والمخاطر، وكمان وسيلة لعدم تآكل المدخرات بمرور الزمن.

ومع توجه البنك الفيدرالي الأمريكي لخفض الفائدة على الدولار وتوقعات الذهب بمواصلته تحقيق مزيد من الصعود عالميا، أوصى خبراء الاقتصاد بشراء الدهب كأداة استثمار وتحوط بدلا من الدولار اللي بيتجه دلوقتي للتراجع وسط ضغوط التضخم اللي بيعاني منها الاقتصاد الأمريكي، وفقا لتوقعات بنك جي بي مورجان، يعني من الآخر كده الدهب زينة وخزينة، وبريقه لا ينطفئ مع مرور الوقت.

كمان هنقولك أسعار الدهب المحلية وصلت لفين انهاردة، وهنبدأ بعيار 14 اللي ارتفع عشان يسجل  2393 جنيه للجرام.

وسجل عيار 18 نحو 3077 جنيه للجرام، وعيار 21 نحو 3590 جنيه للجرام، ووصل سعر عيار 24 إلى 4102 جنيه، أما الجنيه الدهب فارتفع عشان يسجل 28720 جنيه، فلو ناوي تشتري دهب انزل بسرعة وماتترددش لأن توقعات الأسعار في الطالع.