في كلام منتشر قوي الفترة دي عن اسواق اليوم الواحد، وأن اسعار السلع فيها رخيصة جدا عن الاسعار اللي موجودة بره في المولات والهيبرات والسلاسل التجارية.. ياتري اية حقيقة الكلام ده.. واية حكاية اسواق اليوم الواحد دي كمان.. خليكم معانا للآخر وهتعرفوا التفاصيل.
كل فترة الحكومة بتفاجئنا بمنافذ وأنواع جديدة من السلاسل والمحلات التجارية واللي بتقدم سلع وتحفيضات كبيرة للمواطنين علي اسعار السلع والمنتجات بهدف تخفيف الأعباء الاقتصادية علي المواطنين ومحاربة جشع وغلاء الاسعار واللي للاسف بقي موجود ومتوحش في الشارع المصري، وبقي مواجهته في الوقت الحالي صعب جدا، والحل الافضل للتغلب عليه هو وجود البديل اللي يقدم جودة وخدمة ممتازة وكمان سعر أقل عن الأسعار الموجودة في السوق وده اللي عملته الحكومة دلوقتي.
من فترات طويلة وعلشان الدولة توفر السلع والمنتجات اللي بيحتاجها المواطن المصري باسعار منخفضة، قدمت الحكومة أكثر من مباردة لتوفير احتياجات المواطنين من السلع الغذائية زي مبادرة كلنا واحد، ومبادرات أهلا رمضان وأهلا مدارس، وحاليا جه الدور علي مبادرة جديدة لتخفيض اسعار السلع للمواطنين وهيا مبادرة اليوم الواحد .
طيب اية حكاية مبادرة اليوم الواحد واية التخفيضات اللي بتقدمها للمواطنين؟.
حاليا الحكومة طرحت مبادرة جديدة لتوفير السلع الغذائية للمواطنين باسعار مخفضة وهيا مبادرة أسواق اليوم الواحد واللي افتتحت منافذها مؤخرا في المناطق اللي فيها نسبة كبيرة من الزيادة السكانية والمناطق الشعبية وده بهدف توفير افضل خدمة واقل سعر للمواطنين .
اسواق اليوم الواحد دلوقتي بقت موجودة في اغلب مناطق القاهرة والجيزة، وكان اخرها المنفذ اللي افتتحه الدكتور شريف فاروق، وزير التموين والتجارة الداخلية، والدكتور إبراهيم صابر، محافظ القاهرة، في منطقة الأميرية، اللي بيعد السوق التالت بعد افتتاح الأسواق في حلوان ومدينة نصر.
منافذ اليوم الواحد، الحكومة بتكون حريصة فيها علي توفير منتجات كتيرة ومتنوعة كتيرة بيحتاجها كل بيت مصري زي السلع الغذائية والمنتجات الأساسية، وده بهدف تحقيق استقرار الأسعار وتلبية احتياجات المواطنين في توفير السلع بجودة عالية، والمبادرة بتهدف تقديم تخفيضات علي السلع هتوصل لـ 30% مقارنة بأسعار السوق برا، وكمان الأسواق بتشمل كل أنواع المنتجات الغذائية الأساسية زي الزيوت والسكر والأرز واللحوم والدواجن ده غير الخضروات والفاكهة.
وزير التموين والتجارة الداخلية شريف فاروق، قال إن خطة وزارة التموين في الفترة اللي جاية بتستهدف التوسع في اطلاق المبادرات اللي بتهدف لتقديم منتجات عالية الجودة بأسعار أقل من الأسواق التقليدية، وده بهدف تخفيف الأعباء المالية علي الأسر المصرية.
وزير التموين والتجارة الداخلية كمل كلامه وقال أن المبادرات الحكومية اللي بتوفرها الدولة المصرية بتشمل توفير سلع غذائية أساسية زي اللحوم والدواجن والخضروات والفواكه ده غير كل المنتجات اليومية التانية، وده واحد من بنود خطة الدولة لضبط الأسواق في كل المحافظات لتحقيق الاستقرار الاقتصادي وضمان توافر السلع بكميات وأسعار تناسب احتياجات المواطنين.
0 تعليق