الحكومة اتكلمت اكثر من مرة عن تحويل الدعم التمويني العيني الي دعم نقدي.. ياتري الحكاية دي هتم ازاي.. وهل الحكومة هتسلم المواطن كل شهر مبلغ شهري في ايده وهو يشتري اللي يحتاجه ولا اية الحكاية.

الحكومة أعلنت اعتزامها تحويل الدعم التمويني لدعم نقدي، وده في إطار الجهود اللي بتقوم بيها الحكومة لتوصيل الدعم للمستحقين، خصوصا أن الدولة اتاكدت أن الدعم التمويني مش بيوصل لعدد كبير من المستقين وبيوصل لناس تانية مش متسحقة للدعم خالص.
طيب ازاي الحكومة هتطق فكرة الدعم النقدي، وهل الدولة هتسلم كل مواطن الفلوس في ايده ازاي؟.
فكرة تطبيق الدعم النقدي هتم عن طريق منظومة الكارت الموحد واللي الحكومة شغالة عليه حاليا لتسهيل حياة المواطنين وتوفير الخدمات الحكومية بشكل أكثر كفاءة ومرونة ده غير توحيد عدد كبير من الخدمات اللي المواطن بيحتاجها في بطاقة واحدة،وكلها اجراءات هدفها تخفيف التعقيدات المرتبطة باستخدام بطاقات كتيرة جدا زي صرف التموين والخبز وخدمات التأمين الصحي، والمواصلات العامة والخدمات البريدية وغيرها من الخدمات الحكومية اللي بتقدمها الدولة للمواطنين .
طيب ازاي الكارت الموحد هيقضي علي الفساد والدعم يوصل من خلاله للمستحقين؟.
فكرة وجود الكارت الموحد هيا قائمة بحد ذاتها علي مكافحة الفساد خصوصا أنه بيعتمد علي أنظمة رقمية بتضمن وصول الدعم للمستحقين بدقة، والآلية دي هتساعد في تقليل فرص التلاعب أو سوء استخدام الأموال العامة، وده هيعزز الشفافية وهيزيد الثقة في النظام الحكومي. وهيحسن عملية توزيع الدعم وتوفيره للفئات الأكثر احتياجًا.
والحكومة هتبدأ تطبيق منظومة الكارت الموحد بشكل تدريجي، وهتكون البداية من محافظة بورسعيد كمرحلة تجريبية، وهيتم اختبار الكارت للتأكد من فاعليته قبل تعميمه على مستوى الجمهورية، وهتعمل وزارة التموين والتجارة الداخلية بالتنسيق مع الجهات المعنية على استكمال التجارب الفنية لضمان سهولة استخدامه للخدمات المقدمة من خلاله.
وعلشان نكون عارفين أن الحصول علي الكارت الموحد هيكون اختياري من كل الناس مش فرض علي أي مواطن انه يتعامل بيه، وكمان هيكون مجاني بدون اي مصاريف لاصداره وده ضمن خطوات الحكومة لتخفيف الاعباء الاقتصادية علي الناس.
بعد ما المواطن يستلم الكارت فهيكون استخدامه زي استخدام البطاقات الالكترونية مسبقة الدفع ومن خلاله يقدر اي مواطن حيحط أو يسحب فلوس بشكل مباشر من ماكينات الهيئة القومية للبريد وكمان يشتري من ماكينات نقاط البيع.
مش كده بس ده كمان ممكن للمواطن أنه يقدر يستخدم الكارت الموحد في تنفيذ مدفوعات الخدمات الحكومية الرقمية ومعاملات صرف الدعم للخبز والسلع التموينية للمواطن في المخابز ومواقع صرف السلع التموينية ده غير خدمات التأمين الصحي الشامل.
طيب المواطن يعمل اية لو الكارت ده ضاع منه وهل يقدر اي حد يسرق الفلوس منه لو لقاه؟.
الحكومة قالت أنه في حالة فقدان الكارت أو رقم التعريف الشخصي أو لو باظ من المواطن، فبكل سهولة هيقدر يبلغ فورا عن طريق الاتصال بالخط الساخن لمنصة مصر الرقمية على رقم 15999 ويوقفه ويمنع عمل اي تعامل من خلاله، وهيدفع مبلغ مالي بسيط كمصاريف لأصدار كارت جديد بدل القديم