يا ترى ايه حكاية الاتفاقية المهمة اللى وقعتها مصر مع السعودية ؟ وازاى الاتفاقية دي ممكن تعمل قلبان في سوق النقل والشحن بين البلدين؟  إيه تأثير الخطوة دي على الاقتصاد المصري؟ وهل ده معناه طفرة في التبادل التجاري مع الرياض؟

تخيل إن الإفراج الجمركي للبضائع اللي كانت بتاخد 3 أيام بقى ممكن يتم في 3 ساعات بس.. من كام يوم بس، مصر والسعودية أعلنوا عن اتفاقية قوية لتقليص زمن الإفراج الجمركي من 3 أيام لـ3 ساعات بس.. الإعلان ده جه بعد توقيع اتفاقية بين "هيئة الزكاة والضريبة والجمارك" السعودية و"مصلحة الجمارك المصرية".

طب إيه الجديد في الاتفاقية؟
الاتفاقية مبنية على مبدأ "الاعتراف المتبادل ببرامج المشغل الاقتصادي المعتمد".. يعني ببساطة كل دولة هتعترف بمجموعة محددة من المصدرين في الدولة التانية وده هيخلي دخول البضائع بين مصر والسعودية أسرع وأسهل

وليه الاتفاقية دي مهمة؟

الاتفاقية ليها فوايد كتيرة زي توفير وقت ضخم لأن الإفراج الجمركي كان بياخد 3 أيام يعني البضايع كانت بتتأخر والوقت ده بيساوي فلوس كبيرة بالنسبة للشركات لكن دلوقتي مع الـ3 ساعات حركة التجارة هتبقى أسرع بكتير.. كمان الاتفاقية هتوفر مزايا جديدة للمصدرين من البلدين زي تخفيض التكلفة وتسريع دخول السلع وده هيحفز الشركات الصغيرة والمتوسطة إنها تدخل السوق بشكل أكبر

طب الأرقام بتقول إيه؟
التبادل التجاري غير النفطي بين مصر والسعودية مستهدف يوصل لـ8.1 مليار دولار السنة الجاية مقارنة بـ6.7 مليار دولار السنة دي يعني الاتفاقية دي هدفها مش بس تسهيل التجارة لكن كمان مضاعفة الأرقام وكمان خلال زيارة ولي العهد السعودي محمد بن سلمان للقاهرة القطاع الخاص في السعودية أعلن إنه مستعد لضخ استثمارات تصل لـ15 مليار دولار في مصر خلال الـ3 سنين الجايين

وإيه تأثير الاتفاقية على حركة التجارة؟
الاتفاقية دي هتخلق طفرة حقيقية في سلاسل الإمداد بين مصر والسعودية… المصدرين المصريين هتسهل عليهم دخول السوق السعودي وده معناه زيادة كبيرة في الصادرات المصرية للسعودية.. وفي نفس الوقت السوق المصري هيبقى مفتوح أكتر قدام السلع السعودية وده هيزود التنوع في المنتجات المتاحة عندنا.. كمان الاتفاقية بتفتح الباب إن مصر تعمل نفس النوع من الاتفاقيات مع دول خليجية تانية زي البحرين، الإمارات، قطر، والكويت. وده معناه توسع أكبر لحركة التجارة الخارجية

في النهاية تقليص زمن الإفراج الجمركي من 3 أيام لـ3 ساعات خطوة مش بس جريئة، لكنها بتغير قواعد اللعبة تماماً .. وعلى المدى القريب ده هيزود حركة التجارة بين مصر والسعودية بشكل ملحوظ وعلى المدى البعيد هيدعم تنافسية المنتجات المصرية في الأسواق الإقليمية

لكن السؤال الحقيقي هل مصر مستعدة فعلاً لاستقبال الاستثمارات الضخمة اللي ممكن تيجي نتيجة الخطوة دي؟ وهل القطاع الخاص هيقدر يستغل الفرص الجديدة دي بالشكل المطلوب؟ ولا مممكن تبقا زي فرص كتير ضاعت منننا قبل كده