ايه اللي هيحصل في سعر الدهب بمصر بعد قرار البنك الفدرالي الأمريكي بتخفيض سعر الفائدة على الدولار الأمريكي وايه اللي هيحصل في سوق الدهب العالمي والاسعار رايحة على فين.. خليكم معانا للآخر وهتعرفوا التقرير  التالي.
 
طبعا كلنا تابعنا امبارح قرار مجلس الاحتياطي الفدرالي الأمريكي أو البنك المركزي الأمريكي بخفض سعر الفائدة 25 نقطة أساس ووصلت  4.25% و4.5% والقرار مكنش مفاجأة وحصل حسب التوقعات العالمية اللي قالت إن الفدرالي الأمريكي هتيجه لخفض سعر الفايدة في الاجتماعات الجاية وإن زمن التشدد النقدي خلاص خلص..

طيب ليه العالم والاسودداق بتهتم جدا بقرارات الفدرالي الأمريكي ؟
لانه ببساطة حضرتك هو اللي بيرسم تقريباً السياسة النقدية لأغلب البنوك المركزية العالمية بمعني أن البنوك العالمية كلها مرتبطة بالدولار كعملة دولية في التجارة والاحتياطيات الدولية في البنوك دي وهي عملة العالم الرسمية في الاستثمار والاقتراض الدولي والبنوك المركزية في العالم بردو مرتبطة بالتجارة والأسواق الأمريكية لانها أقوى اقتصاد في العالم ولأن الدولار هو العملة الرسمية في أسواق النفط والذهب والتحويلات المالي.. يعني سطوة الدولار الأمريكي هي سبب قوة الفدرالي وسبب قوة القرارات اللي بياخدها وتأثيرها على كل العالم بلا استثناء ولو لاحظنا هنلاقي إن أغلب البنوك المركزية العالمية بتحرك سعر الفايدة عندها بنت يتماشى مع قرارات الفدرالي الأمريكي زي البنوك الخليجية والأسيوية مثلا ودا بسبب ارتباط الدولار بالتسعير في سوق البترول.

طيب ايه تأثير قرار الفدرالي الأمريكي على أسواق الدهب في العالم ومصر ؟
شوف حضرتك في الاقتصاد العالمي كل حاجة واضحة وبيمشب بمعادلات اقتصادية معروفة وفي حالة خفض سعر الفايدة على الدولار من البنك المركزي الأمريكي سعر الدهب بيرفع بشكل تلقائي ودا لأن الدولار والدهب ماشيين عكس بعض بمعني لو الدولار رفع يبقي الدهب هيقل والعكس صحيح ودا لأن الدهب بيعتبر عدو أو بديل للدولار وخفض سعر الفايدة الأخير معناه اتجاه المستثمرين والشركات والبنوك المركزية للاستثمار في الدهب بعيدا عن الدولار او البنوك اللي فائدتها قلت أو نزلت
وهنا لازم نفرق بين تصرف الشركات والافراد واللي بيشتروا دهب ويستثمروا فيه لما الفايدة على الدولار ودا عشان المعدن الأصفر هنا بيكون اكتر ربح انا البنوك المركزية فبتشتري دهب في حالة خفض الفدرالي الأمريكي للفائدة لتعويض الخسارة في الاحتياطي النقدي اللي هو بالدولار وفي كل الأحوال الطلب على الدهب بيزيد عالميا ولأن الدهب معدن نادر فزيادة الطلب معناه ارتفاع كبير في الأسعار العالمية واي رفع في الأسعار عالميا السوق المصري بتتأثر بشكل مباشر ودا اللي أكده رئيس شعبه الدهب لبانكير وقال إن 85% من أسباب ارتفاع اسعار الدهب في مصر راجع للسوق العالمية.

ولو فاكرين قلنا هنا في بانكير قبل كده إن سعر الدهب عالمياً هيعدي 3 آلاف دولار مع بدايات 2025 ودا اللي أكدته مؤسسات مالية دولية في اكتر من منباسبة ودا معناه بردوا أن أسعار الدهب هتزيد بشكل كبير في مصر الفترة الجاية حسب قواعد السوق العالمية وان الجرام عيار 21 هيبدأ رحلته لمستويات هتعدي ال4 آلاف جنيه بكتير في الفترة الجاية وعشان كده دا الوقت المناسب لو هتشتري دهب.