في ناس كتير من الشعب المصري عندهم قلق بسبب صيف 2025، وهل هيكون في تخفيف أحمال مرة تاني ولا لا.. واية هيا خطة الدولة لتأمين الكهرباء في 2025.. وازاي الدولة بتأمن التغذية الكهربائية للمواطنين من دلوقتي.

زي ما احنا عارفين أن المصريين عاشت فترة صعبة في الايام اللي فاتت بسبب أزمة تخفيف الأحمال وقطع الكهرباء علي الناس في كل البيوت والشوارع وفي كل المحافظات وللاسف الوضع ده استمر معانا فترات طويلة لأكثر من سنة كاملة الناس استملت فيها القعدة في الضلمة وبدأ قطع الكهرباء لمدة 60 دقيقة وبعدين بقت 120 دقيقة في بعض الاحيان كانت بتوصل لأكثر من 3 ساعات، وفي محافظات كتيرة خصوصا في القري والصعيد كانت بتتعدي أكثر من كده بكتير.

طيب اية اللي حصل في موضوع حل أزمة تخفيف الأحمال في مصر؟.
الحكومة لما شافت حالة الغضب اللي كانت موجودة عند اغلب الناس بسبب عجز الدولة علي حل أزمة قطع الكهرباء، علي الفور الدولة تخلت واضطرت أنها تفتح باب الاستيراد للمواد البترولية من الخارج خصوصا المازوت والغاز الطبيعي، وفعلا الدولة تكفلت بمليار و 200 مليون دولار علشان تأمن احتياجات محطات توليد الكهرباء من المواد البترولية، وفعلا الدولة أعلنت وبشكل رسمي أنتهاء ازمة تخفيف الأحمال في مصر وللابد، ومن شهر يونيو اللي فاتت والدولة معرفتش حاجة تانية اسمها تخفيف الأحمال، واي قطع للكهرباء دولوقتي بيكون أعمال عطل فني أو اعمال صيانة.
طيب ازاي الدولة هتأمن صيف 2025 للمواطنين ؟.

وزارة الكهرباء والطاقة المتجددة حاليا وقعت خطة لتأمين صيف 2025، وهيتم إضافة 4 آلاف ميجا وات بتكلفة استثمارية هتوصل لـ 4 مليارات دولار وهتكون من مشروعات الطاقة الجديدة والمتجددة من مشروعات بيتم تنفيذها حاليًا مع القطاع الخاص، والطاقة دي هتدخل علي الشبكة قبل حلول فصل الصيف اللي جاي لتجنب اللجوء لتخفيف الأحمال.

خطة وزارة الكهرباء تضمنت كمان إضافة قدرات هتوصل لـ 2000 ميجا وات منهم 500 ميجاوات طاقة شمسية من مشروع أبيدوس طاقة شمسية واللي تم ربطها على الشبكة القومية للكهرباء، علاوة على إضافة 1500 ميجاوات وتم ربطهم بالشبكة القومية للكهرباء من مشروع الطاقة الشمسية أمونت طاقة رياح الجارى، ده غير نظام التخزين بالبطاريات واللي بدأ دخوله لاول مرة فى مصر.

الخطة كمان بتستهدف إنشاء محطات لإنتاج الكهرباء من الشمس والرياح بقدرة 650 ميجاوات، وهيتم الانتهاء من 200 ميجا وات في الأيام اللي جاية، ده غير  450 ميجا وات هيتم ربطهم بالشبكة القومية للكهرباء بحلول شهر مايو المقبل.

وزارة الكهرباء والطاقة المتجددة قالت أنه إضافة 4 آلاف ميجاوات للشبكة الكهربائية من الطاقة المتجددة هيوفر للدولة 500 مليون و800 ألف جنيه يوميا ودي تكلفة الوقود المستخدم لإنتاج نفس الكمية من الكهرباء، ده غير التشغيل لمشروع الربط الكهربائي المصري السعودي والمقرر دخوله الخدمة بحلول مايو المقبل بقدرة 1500 ميجاوات في المرحلة الأولى، وهيتم التشغيل الكلي للمشروع قبل نهاية العام المقبل باجمالي 3000 الف ميجاوات.