الذهب واحد كان من الحاجات اللي حققت مكاسب كبيرة جدا في 2024، وكان الاقبال عليه كبير جدا من المصريين وتعدي كل الخيال.. ياتري المصريين اشتروا ذهب أدوا اية في 2024.. ومعدل الزيادة وصلت لأد ايه.
 

الذهب واحد من اهم مجالات الاستثمار في العالم، واللي علي مدار تاريخه كان دايما كسبان، ولكن سنة 2024 كانت واحدة من اكثر السنين غرابة، خصوصا أنها شهدت تسجيل اعلي مستوي لسعر الذهب لحد دلوقتي، وبعدين رحت وسجل أقل سعره في نفس السنة.

طيب ازاي بدات رحلة اسعار الذهب في 2024؟.
الذهب عيار 21  افتتح تداولات عام 2024 عند سعر 3170 جنيها للجرام، وسعره ارتفع بعد كده بدرجة كبيرة ووصل لأعلى مستوى سعر في تاريخه لما وصل لـ4200 جنيه للجرام وكان يوم 31 يناير، وكان الكل متوقع أن يواصل الصعود ويسجل اسعار تاريخيه، ولكن لما الدولة حطت ايدها واخذت قرارها التاريخي بتحرير سعر صرف الجنية المصري قدام الدولار بشكل مرن الدنيا اتغيرت تماما خصوصا ان السوق السودا في التجارة بالعملات انتهت تماما ومبقتش موجودة، وعلشان كده الذهب رجع لسعره الطبيعي وسجل اقل سعره له في 2024لما وصل لـ 2620 جنيها للجرام وتحديدا في 3 مارس.

رغبة المصريين في البحث عن ملاذ أمن للاستثمار خلت الناس كلها تجري تشتري ذهب خصوصا أن سجلت ارقام قياسية موصلشل لها قبل كده لما سجل 4200 جنية للجرام عيار 21، ووصلت مشتريات المصريين من الذهب خلال أول 9 أشهر من عام 2024 لـ 38 طن وعلي الرغم من ان الرقم ده ضخم جدا ولكنه اقل من الرقم اللي المصريين اشتروه في 2023 لما المصريين اشتروا 45 طن من الذهب.

طيب اية ابرز الحاجات اللي اثرت علي رحلة الذهب في 2024؟.
أزمة نقص السيولة الدولارية اللي كانت بتواجه مصر في بداية 2024، واللي كانت موجودة في مصر بسبب صعوبات في تأمين الدولار خلت الناس تجري تشتري الذهب كملاذ آمن وفضلت الأوضاع علي كده لحد ما الحكومة وقعت صفقة الاستثمار السياحي في صفقة رأس الحكمة اللي ساعدت على استقرار الاحتياطي الدولاري وساعدت البنك المركزي المصري في توفير حصيلة دولارية كبيرة لتأمين الاستيراد، وبعدها جه القرار التاريخي بتحرير سعر صرف الجنية المصري بشكل مرن قدام العملات الأجنبية واللي كانت معاها شهادة وفاة السوق السودا في التجارة بالعملات الأجنبية تماما.

بعد ما الأوضاع استقرت في مصر بالنسبة لسعر الصرف، مشتريات المصريين من الذهب بكل أشكاله ارتفعت وسجلت 14.4 طن خلال الربع الثاني، مقسمة بين 7.6 طن لمشتريات العملات والسبائك الذهبية، و6.8 طن لمشتريات المشغولات الذهبية ومعدل الطلب على الذهب كملاذ آمن ارتفع بدرجة كبيرة نتيجة استمرار تراجع قيمة الجنيه المصري.

واحد من الحاجات اللي ساعات في إستقرار أسعار الذهب في مصر علي مدار 2024 كانت لما مصر استقبلت الدفعة الثانية من صفقة رأس الحكمة وتحديدا في شهر مايو واللي وصلت قيمتها ل 20 مليار دولار، ودي كانت لها مفعول السحر في تحسين احتياطي النقد الأجنبي في مصر وساهمت في تهدئة أسعار الذهب.

واحدة كمان من الحاجات اللي ساعات في إستقرار أسعار الذهب في مصر كانت الإجراءات اللي فرضتها الحكومة المصرية لمراقبة سوق الذهب ومحاولة ضبط الأسعار، واللي شملت زيادة الضرائب الجمركية على الذهب المستورد، وطبعا كان لها تأثير كبير  علي الأسعار المحلية.

طيب ليه الذهب في الفترة الأخيرة رجعت أسعاره ترتفع تاني؟.

الربع الثالث من 2024 أسعار الذهب بدأت ترتفع تاني والذهب سحب وقتها د 3160 جنيه للجرام بزيادة وصلت في الوقت ده ل 400 جنيه، ووصلت مشتريات المصريين من الذهب بكل أشكاله ل 10.4 طن متهم 5.3 طن مشتريات عبارة عن العملات والسبائك الذهبية، و5.1 طن لمشتريات المشغولات الذهبية، والسبب الرئيسي في زيادة ألاسعار كان بسبب تباطؤ الإنتاج المحلي وارتفاع التوترات في المنطقة العربية واللي ساهمت في زيادة الطلب على الذهب كملاذ آمن في الأسواق المحلية والعالمية.