يا ترى أسعار النفط رايحة على فين في 2025؟ وهل البرميل هيكسر حاجز 70 دولار؟ ولا فيه مفاجآت ممكن تقلب الموازين؟ وإيه الحاجات اللي بتأثر فعلاً على سعر النفط؟

النفط اللى بيعتبر السلعة اللي بتحرك اقتصاد العالم كله أسعارهامستقرة نسبيًا فى الشهور اللى فاتت.. لكن مع بداية 2025 التوقعات كلها بتشير لحاجة واحدة:  تغيرات جديدة في الأسعار.

السؤال هنا.. البرميل هيبقى بكام؟ وإيه اللي بيحدد السعر ده؟

طبقًا لتقارير حديثة من بنوك كبيرة زي جي بي مورجان وجولدمان ساكس، متوسط سعر برميل خام برنت في 2025 ممكن يوصل لـ71.5 دولار.. أما خام غرب تكساس الوسيط فمتوقع يوصل حوالي 67.4 دولار.

بس هل الأرقام دي أكيدة؟

طبعًا لأ.. ليه؟ لأن السوق مليان متغيرات.. وخلينا نبدأ بأهم حاجة .. الطلب العالمي.. الصين اللي كانت زمان بتستهلك نص النفط اللي بيدخل السوق دلوقتي مساهمتها قلت لـ20% بس في نمو الطلب.. لأن اقتصادهم بيعاني من أزمات في العقارات وانتشار السيارات الكهربائية اللي قللت استهلاك البنزين.

على الناحية التانية فيه تخمة في المعروض.. وكالة الطاقة الدولية بتقول إن السوق ممكن يواجه فائض بحوالي 950 ألف برميل يوميًا في 2025.. وده معناه إن الإنتاج أكبر من الطلب وده ممكن يضغط على الأسعار.

طب إيه اللي ممكن يحصل عشان الأسعار تعلى؟

الجواب فى سياسة سياسة أوبك بلس.. المنظمة دي بتلعب دور كبير في التحكم في السوق.. لو قررت تخفض الإنتاج بشكل أكبر.. الأسعار ممكن ترتفع.. لكن لو المعروض زاد خاصة مع المشاريع الضخمة في دول زي البرازيل والنرويج ده ممكن يخلي الأسعار تحت ضغط.

وفيه عوامل تانية بتتحكم في السعر وعلى راسها طبعا المخاطر الجيوسياسية.. أي توتر في الشرق الأوسط ممكن يرفع الأسعار فجأة..كمان الدولار الأمريكي وكل ما الدولار يقوى السلع زي النفط بتبقى أغلى للمشترين بعملات تانية.. بالاضافة كمان للسياسات الاقتصادية العالمية زي أسعار الفايدة في أمريكا اللي ممكن تخلي المستثمرين يبعدوا عن السلع بشكل عام.

لكن اللي لازم تعرفه.. إنه رغم كل التوقعات اللي كانت بتقول إن السوق هيبقى مستقر نسبيًا في 2024.. الوضع في 2025 ممكن يكون مختلف تمامًا السوق بيتحرك بسرعة وبعوامل ممكن تظهر في لحظة وتغير المشهد بالكامل.