يا ترى لو عايز تاخد قرض من أي بنك في مصر عشان تفتح مشروع جديد أو تتجوز أو تفرش شقتك تعمل إيه، وإيه هي أفضل البنوك اللي بتقدم تسهيلات أو تيسيرات دلوقتي، وممكن القرض ده يوصل لكام.
 

كتير من البنوك  المصرية، بتقدم دلوقتي باقة كبيرة ومتنوعة من القروض، خاصة مع نهاية سنة 2024 وبداية 2025، عشان تلبي احتياجات عملائها من ناحية، وتعظم مواردها من ناحية تانية من قيمة فايدة القرض.

ومن هنا، بنك قناة السويس بيقدملك  قرض شخصي بيوصل ل 3 مليون جنيه، وأنت بقى واحتياجاتك، ومش شرط هنا تحول مرتبك على البنك.

طب إيه هي مزايا القرض الشخصي من بنك قناة السويس؟

بص يا سيدي، من أهم مزايا القرض ده، إن ذه زي ما قولنا بيوصل ل 3 مليون جنيه، ومتاح تدفعه على أقساط شهرية، كمان مدة القرض بتبدأ من 6 أشهر وبتصل إلى 7 سنين، يعني هتسد براحتك خالص.

كل ده، بجانب إن القرض بيتيح لحضرتك التأمين على الحياة طوال فترة القرض، بجانب سهولة سداد الأقساط من خلال فروع البنك، أو عن طريق الخدمات المصرفية عبر الإنترنت، وكمان بيتيح دمج التسهيلات الائتمانية الخاصة بالعميل في مكان واحد، يعني ممكن تسدد مديونياتك من خلا البنوك التانية عادي وبكل سهولة.

بس في شوية شروط كده مطلوبة عشان حضرتك تقدر تاخد القرض، واللي أولها أن لازم الأدنى لسن الشخص المقترض يكون 21 سنة، كمان الحد الأقصى للسن يكون 60، ضيف على ده إن الحد الأدنى لصافي الراتب الشهري بتاع حضرتك لازم يكون 4000 جنيه.

أما بالنسبة للأوراق المطلوبة للحصول على القرض، فهي بطاقة الرقم القومي سارية، وفاتورة مرافق حديثة لآخر 3 شهور، وكمان شهادة إثبات دخل حديثة أو إيصالات الراتب لآخر 3 شهور، ولازم كشف حساب بنكي لآخر 3 شهور.

فلو حضرتك مجهز كل الورق ده ومحتاج القرض بأقصى سرعة، فهنا لازم تتوجه لأقرب فرع لبنك قناة السويس في منطقتك، وتاخد قرضك بكل سهولة.

وبعيدا عن القرض الشخصي، فبنك قناة السويس في الفترة الأخيرة، بينفذ مبارات اجتماعية واقتصادية عشان يدعم الاقتصاد المصري، ومن ضمن المبادرات دي هي منح مجموعة حديد العشري تسهيلات ائتمانية بقيمة 2.35 مليار جنيه لدعم خططها التوسعية.

وده بيؤكد إن البنك ده بيستهدف تمويل رأس المال العامل للمجموعة، عشان يساهم في دعم خططها التوسعية وزيادة قدرتها على تلبية احتياجات السوق المحلي وتعزيز الصادرات،  وده طبعا هيقدر يفتح آفاق جديدة للتعاون المستقبلي مع الشركاء الأجانب، ومش بس كده ده هيعزز قدرة المؤسسات على النمو والتوسع، من خلال تقديم الحلول التمويلية المُبتكرة اللي تقدر تُمكنهم من توسيع نطاق أعمالهم وتحقيق أهدافهم الاستراتيجية.

طبعا كل ده كلام جميل، بيؤكد إن البنوك المصرية أصبحت شريكة فى دعم القطاعات الاقتصادية الحيوية، واللي بتساهم في دفع عجلة نمو الاقتصاد القومي، وتقدر تحقق قيمة مُضافة للاقتصاد المصري.