كتير من شباب مصر شايفين إن الوظيفة مش هي الحلم اللي هتحقق أحلامهم خاصة بعد الطفرة في القطاعات الاقتصادية وتنوع النشاط الاقتصادي وزيادة فرص العمل الخاص وعمل المشروعات الخاصة.. لكن التمويل بيكون العقبة الأكبر في عمل اي مشروع أو شركة صغيرة لسه هتبدأ.. دلوقتي متقلقش هنقولك تجيب تمويل منين.. خليكم معانا للآخر وهتعرفوا التفاصيل.
كتير من البنوك في مصر بتتنافس لتقديم أفضل الخدمات المصرفية للمشروعات الخاصة والشركات الناشئة.. وده بيساهم في دفع النمو الاقتصادي وتشجيع الابتكار.. الشركات الناشئة بقت جزء حيوي في الاقتصاد العالمي لأنها بتساهم بشكل كبير في خلق فرص العمل وتحفيز الابتكار.
ولو بتسأل عن البنوك اللى بتقدم قروض للشركات الناشئة فالبنك التجاري الدولي (CIB) بيُعتبر من أكبر البنوك الخاصة في مصر وبيتميز بتركيزه على الخدمات المصرفية للأفراد والشركات الكبرى.. CIB بيقدم حلول مصرفية متكاملة للشركات الناشئة زي حسابات تجارية و تسهيلات ائتمانية وخدمات إلكترونية متطورة بتسهّل إدارة الأعمال.
بنك مصر كمان بيقدم مجموعة متنوعة من الخدمات المصرفية للمشروعات الخاصة وللشركات الناشئة بما فيها تسهيلات تمويلية وبرامج دعم فني.. والبنك وقّع اتفاقية قرض مشترك بقيمة مليار دولار.. وده بيعكس قدرته على توفير التمويل اللازم لدعم المشروعات الجديدة.
وبيُعتبر البنك العربي الأفريقي الدولي من البنوك الرائدة في تقديم خدمات مصرفية متكاملة.. البنك بيلعب دور مهم في تشكيل الاقتصاد المصري وتعزيز النمو الاقتصادي وبيقدم منتجات وخدمات في مجال الخدمات المصرفية للأفراد والشركات والخدمات المصرفية الاستثمارية.
كمان البنك المركزي بالتعاون مع الاتحاد الأوروبي والوكالة الألمانية للتعاون الدولي أطلق منصة "افهم بيزنس" بالتعاون مع المعهد المصرفي المصري ودي بتهدف لتقديم الدعم الفني للشركات الناشئة والشركات الصغيرة.
وخلينا نقولك شوية نصائح لاختيار البنك المناسب لشركتك الناشئة.. حدد احتياجات مشروعك أو شركتك من الخدمات المصرفية زي الحسابات التسهيلات الائتمانية والخدمات الإلكترونية.. وقارن بين البنوك المختلفة من حيث الخدمات المقدمة، الرسوم، والدعم الفني.. بعدها اختار بنك بيقدم خدمات مصرفية إلكترونية متطورة لتسهيل إدارة حساباتك ومعاملاتك.. ودور على بنك بيوفر برامج دعم وتوجيه لرواد الأعمال والشركات الناشئة.
وخد بالك اختيار البنك المناسب لشركتك الناشئة في 2025 بيعتمد على احتياجاتك الخاصة وطبيعة نشاطك التجاري..و البنوك المصرية بتسعى لتقديم أفضل الخدمات لدعم رواد الأعمال والمساهمة في نمو الاقتصاد الوطني.
0 تعليق