لما 3 من أكبر النقابات المهنية في مصر (الصحفيين، المهندسين، والمحامين) يقرروا فجأة وقف التعامل مع معامل تحليل زي البرج والمختبر وألفا.. لازم نسأل نفسنا ده حصل ليه .. وليه النقابات اللى بتضم في صفوفها مئات الالاف خدت قرار جريء زي ده ؟ وايه حكاية الممارسات الاحتكارية اللى بتمارسها المعامل دي مع المرضى ؟ وفين الأجهزة الرقابية من كل اللي بيحصل ده ؟

يوم التلات اللى فات خرج بيان مشترك من نقابات الصحفيين والمهندسين والمحامين بيعلنوا فيه قرار تاريخي: إيقاف التعامل مع معامل البرج، المختبر، وألفا.. بسبب الزيادات الكبيرة في الأسعار اللي بيقدموها بجانب شكاوى عن إن في معاملات تمييزية بين النقابات وجهات تانية.

طبعًا القرار ده عمل ضجة كبيرة بين الأعضاء  وبدأت الإشاعات تتنشر والكلام يكتر حوالين المعامل دي زي مثلًا إن فيه شركة إماراتية هي اللي بتملك البرج والمختبر.

بس هل الكلام ده حقيقي؟ وهل النقابات محقة في قرارها؟ لما نعرف التفاصيل هنقدر نجاوب على الأسئلة دي ببساطة.

وفقا لتحقيق نشرته منصة “متصدقش” على منصات التواصل الاجتماعي .. الحكاية كلها وراها شركة اسمها التشخيص المتكاملة القابضة.. الشركة دي تأسست سن  2014 في جزيرة جيرسي... أيوة، جيرسي..  الجزيرة دي ملاذ ضريبي معروف للشركات اللي عايزة تتهرب من دفع الضرائب وتتلاعب فى أرباحها وتحط أرقام مش حقيقية عشان تهرب من أي ملاحقات.

ووفقا لمعلومات “متصدقش”  الشركة دي بتتحكم مش بس في معامل البرج والمختبر لكن كمان في شركات زي Ultra Lab وبيولاب وغيرها في مصر والسودان والسعودية.. يعني إحنا قدام شركة عملاقة مسيطرة على نص سوق التحاليل الطبية في مصر وبعض الدول العربية كمان.

من الحاجات اللي لازم نعرفها إن شركة التشخيص المتكاملة بتستغل حاجات زي تسجيلها في ملاذات ضريبية علشان ما تدفعش الضرائب على الأرباح اللي بتكسبها في مصر. . طبعًا ده بيحصل بطرق قانونية لكن فيها التفاف واضح.. يعني ببساطة الشركة بتسجل أرباحها خارج مصر وتقلل الإيرادات دفتريًا بطرق معينة علشان تهرب من الضرائب.

طب إزاي وصلنا للوضع ده ؟

الموضوع بدأ من زمان لما شركة إماراتية اسمها "أبراج كابيتال" دخلت السوق المصري سنة 2008 واشترت سلسلة معامل البرج.. وبعدين استحوذت على المختبر.. ومن هنا عملت كيانات ضخمة شبه محتكرة للسوق وده خلا الشركة تقدر تتحكم في الأسعار وترفعها براحتها.. والنهارده الشركة عندها أكتر من 567 فرع في مصر لوحدها وبتحقق 82% من إجمالي أرباحها من السوق المصري بس. . يعني إحنا المصدر الأساسي اللي الشركة بتكسب منه.

طب ليه النقابات وعلى رأسها نقابة الصحفيين قررت تتصدى لممارسات الشركة؟

لما تشوف إن أرباح الشركة في 2024 وصلت لـ4.1 مليار جنيه في أول 9 شهور بس.. وإنها رفعت الأسعار بنسبة 23% في سنة واحدة... تفهم ليه النقابات قررت تقول "كفاية كده".. النقابات شايفة إن اللي بيحصل ده استغلال مباشر للأعضاء.. خصوصًا إن الخدمات دي أساسية.. ومش من الطبيعي إنها تبقى بالشكل ده.

طب ليه إحنا بنفتح الملف ده النهاردة ؟ وايه أهميته للمشتركين في خدمات العلاج مع المعامل دي؟

ببساطة .. المعامل دي مش ملتزمين بالأسعار اللي في تعاقدات المؤسسات والمنظمات .. واحتكارهم لسوق التحاليل فى مصر  خلاهم يغيروا أسعار التحاليل والفحوصات لدرجة ان فرق سعر الفحص بعد الزيادات وصل ل١٠٠%  زياده في بعض التحاليل.. وده الكلام الي قالوا وأكد عليه نقيب الصحفيين خالد البلشي.

وفكرة ان أماكن زي دي يتحولوا لتجار..  وتجار بس.. ده مؤشر خطر ولازم الجهات المعنية تدق جرس انذار .. لأن لما يكون هدفهم الربح .. والربح وبس.. وبأرقام زياده  بالبشاعة دي مع نقابات متعاقده فعليا زي الصحفيين والمحامين والمهندسين .. طب هيعملوا ايه مع المواطنين كل سنة في الزيادات .. وهل وقتها هيتموا بجودة الخدمة اللى بيقدموها ولا بالأرباح اللي بيحقققوها

وإيه أهمية التحركات اللي بتعملها نقابة الصحفيين لكشف ممارسات معامل التحاليل؟

نقابة الصحفيين مؤسسة مهمة من مؤسسات المجتمع المدني ودورها تكشف وتسلط الضوء على أي ممارسات غير قانونية في تعاقداتها مع الجهات المختلفة .. واللى بتعمله نقابة الصحفيين مع المهندسين والمحامين هيكون ليه دور مهم وقوي فى إحداث ثورة في طريقة تعامل المعامل دي مع التجمعات والروابط المهنية وكمان مع الجمهور العادي اللي بيتعامل معاها.

وممكن اللي بتعملوا نقابة الصحفيين ده مع النقابات التانية يخلينا نشوف قريب  شركات وطنية تنافس الشركات العملاقة دي.. وكمان يغير في طريقة إدارة سوق التحاليل الطبية.

ولازم كلنا نقف في ضهر نقابة الصحفيين وندعم موقفها اللي بيؤكد انحيازها لهموم أعضائها وهموم كل المصريين.