ليه الجنيه المصري فضل صامد رغم جنون الدولار؟ وإزاي البنك المركزي المصري نجح فى القضاء على السوق السوداء للعملة؟ وهل فعلاً الإجراءات اللى خدها صناع السياسة النقدية كان ليها تأثير على عودة الهدوء والاستقرار لسوق الصرف ؟

السنة اللي فاتت كانت من أصعب السنين على الاقتصاد المصري.. وكلنا شفنا قفزات الدولار اللي وصلت لأرقام مخيفة.. السوق السوداء كانت شغالة زي النار..  وكل يوم كان فيه سعر جديد للدولار بره البنوك لكن مع نهاية 2023 وبداية 2024  البنك المركزي المصري بدأ يتحرك بسرعة بخطة واضحة وقوية والنتايج بدأت تبان من مارس 2024 واستمرت لحد دلوقتي.

في مارس اللى فات  البنك المركزي قرر رفع أسعار الفائدة بنسبة كبيرة وصلت لـ600 نقطة أساس  لجذب المدخرات من الناس اللي كانوا بيروحوا للسوق السوداء عشان يغيروا فلوسهم.. الفايدة المرتفعة خلت الشهادات البنكية بالجنيه المصري أكتر جاذبية وبالتالي قل الطلب على الدولار.

وفي نفس الشهر المركزي قرر تحرير سعر الصرف أو اللي بنسميه "التعويم".. بمعنى إن الجنيه بقى بيتحدد سعره حسب العرض والطلب في السوق.. وده كان القرار اللي قضى تقريباً على السوق السودا لأن البنوك بقت بتقدم الدولار بسعر قريب من السوق وفى بعض الأحيان أعلى كمان فمحدش كان محتاج يروح يتعامل بره النظام المصرفي.

بفضل الإجراءات دي العوايد الدولارية بدأت تدخل من مصادر مختلفة زي  السياحة، الصادرات، وتحويلات المصريين في الخارج والاحتياطي النقدي وصل لمستويات كويسة مقارنة بالسابق وده إدّى أمان أكتر للسوق وخلال الهدوء والاستقرار يرجع لسوق الصرف.

كمان البنك المركزي اشتغل على جذب استثمارات أجنبية في أدوات الدين المحلية… و "الأموال الساخنة" لعبت دور مهم في ضخ دولارات جديدة للسوق المصري وده خفف الضغط على الجنيه ولو بشكل مؤقت.

وبسبب تحركات البنك المركزي النشطة السوق السودا اللي كانت شغالة 24 ساعة اختفت تماما وتم القضاء على المضاربين لأن مفيش مكسب حقيقي للتجار بعد تحرير سعر الصرف.. كمان البنك المركزي كان دايماً بيضخ دولارات في السوق وقت الأزمات عشان يضمن استقرار السعر في البنوك.

ورغم كل اللي فات.. فيه تحديات كبيرة لسه موجودة.. زي التضخم اللي لسه مستمر.. وارتفاع أسعار السلع اللي مأثر على حياة الناس اليومية.. كمان الأموال الساخنة مش حل دائم لأنها ممكن تخرج بسرعة لو حصلت أي تقلبات في السوق

طب إزاي نحقق الاستدامة؟

الإجراءات اللي البنك المركزي عملها قوية.. لكن لازم نركز أكتر على الاستثمار في الإنتاج… محتاجين نزود الصادرات ونعزز الصناعة المحلية ونقلل الاعتماد على الاستيراد..و الحلول المستدامة دي هي اللي هتخلي الاقتصاد المصري أقوى قدام أي أزمة

في النهاية البنك المركزي المصري أثبت إنه قادر يتحرك بسرعة ويدير الأزمات بحرفية لكن السؤال اللي لازم نفكر فيه هو هل نقدر نحول الحلول المؤقتة دي لاستراتيجية طويلة الأمد؟