يا ترى ليه الدولار بعد ما  كان بيجري زي الحصان الجامح ووصل لفوق ال 51 جنيه بدأ يرجع والأمور تستقر فى سعر الصرف ؟ إيه اللي حصل؟ وليه فجأة الجنون ده وقف والدولار استقر حوالين الـ50 جنيه و50 قرش؟ وهل ده هدوء ما قبل العاصفة ولا بداية للسيطرة؟ وإيه علاقة صندوق النقد والاتحاد الأوروبي بالموضوع ده؟

خلونا نفهم إيه اللي بيحصل..  الفترة اللي فاتت الدولار عمل ارتفاعات تاريخية  لحد ما وصل لأرقام ماحدش كان يتخيلها.. وده كان بسبب أزمة نقص العملة الأجنبية اللي خلت السوق كله مشلول.. إنما فجأة الدولار استقر والسعر ثابت بقالوا كذا يوم

فهل الاستقرار ده حقيقي وله أسباب قوية، ولا مجرد "هدنة" مؤقتة؟

عشان نجاوب على السؤال ده لازم نفهم اللى حصل الكام يوم اللى فاتو .. وأول حاجة لازم نتكلم عنها هي الاتفاقية اللي مصر وقّعتها مع الاتحاد الأوروبي واستلمت بموجبها مليار يورو..  الاتحاد الأوروبي كان هدفه إنه يدعم الاقتصاد المصري وسط الأزمة وده وفر شوية سيولة في العملة الصعبة وساعد البنك المركزي إنه يتحكم في الطلب على الدولار.

وخد بالك الاتحاد الأوروبي مش بس دعم مصر بالمليار يورو لكن كمان فيه دعم سياسي واقتصادي أكبر بيحاول الاتحاد يقدمه.. أوروبا عارفة كويس إن استقرار الاقتصاد المصري حاجة أساسية لاستقرار منطقة البحر المتوسط.

طب هل المليار ده كفاية؟
طبعاً لأ.. ده أشبه بمسكن سريع يخفف الألم بس مش بيحل المشكلة جذرياً لكن يفضل خطوة إيجابية في ظل شح العملة الصعبة.

طب وايه دور الشريحة الرابعة من قرض صندوق النقد فى اللى بيحصل؟

مصر حالياً عندها اتفاق قرض مع صندوق النقد الدولي بقيمة 8  مليارات دولار واللي بيتصرف على شكل شرايح لحد دلوقتي مصر استلمت 3 شرائح والشريحة الرابعة كانت محل جدل لفترة.. لكن خلاص مصر خدت موافقة مبدئية لاستلام الشريحة الرابعة.

طيب إيه علاقة ده بالدولار؟
شرايح القرض لما بنستلمها بتعمل حاجتين مهمين .. أولا  بتوفر سيولة مباشرة في العملة الصعبة.. وثانيا بتدّي رسالة للمستثمرين إن الوضع الاقتصادي في مصر بيتحسن وده ممكن يخفف الضغط على الجنيه.

طب وسياسات البنك المركزي كان دورها ايه ؟

البنك المركزي برضه كان ليه الدور الأهم في الهدوء ده.  المركزي شدد الرقابة على السوق السودا وكمان كثّف محاولاته لتوفير الدولار في السوق الرسمية لتغطية احتياجات الاستيرادو الخطوة دي خلت الناس تلجأ بشكل أقل للسوق غير الرسمية اللى بعد كده اختفت تماما وده قلل الضغط على الدولار.

طب هل ده استقرار حقيقي ولا مجرد استراحة محارب؟
الحقيقة  الاستقرار الحالي مدعوم بمجموعة من الإجراءات زي التمويلات الخارجية والرقابة على السوق السودا.. لكن الحل الجذري للأزمة هيجي من حاجتين زيادة الصادرات بشكل ضخم وتشجيع الاستثمار الأجنبي اللي يدخل سيولة جديدة البلد