إيه اللي بتعمله مصر في افريقيا وإزاي هتكون البوابة الاقتصادية الرسمية للقارة السمراء وايه حكاية المشروع اللي هيدخل مليارات الدولارات لمصر في السنة بالقارة الأم.. خليكم معانا للآخر وهتعرفوا التفاصيل في التقرير التالي.
 
افريقيا من أهم الأسواق الاقتصادية لمصر وهي بمثابة كنز للدولة المصرية لأن فيه ثورات اقتصادية كبيرة بتحصل في دول أفريقية كتيرة وكل يوم حجم الاقتصاديات بيزيد في القارة البكر واللي فيها ثروات طبيعية مش موجوده في أي قارة تاني ودي فرصة لمصر أنها تنتشر اكتر واكتر في واحدة من اقرب الأسواق ليها واللي متعطشة للمنتجات المصرية والأهم أن افريقيا بتعترف بفضل مصر عليها في السنين اللي فاتت لأن مصر بتمد يد المساعدة والعون في مجالات كتير في القارة الأفريقية

. ودلوقتي فيه تعاون اقتصادي واتفاقيات كتير بين مصر والدول الأفريقية وفيها تفضيل للشركات والمنتجات المصرية عن غيرها وشفنا مشروعات عملاقة نفذتها الشركات المصرية في دول أفريقية وعربية في افريقيا زي اللي بيحصل في ليبيا دلوقتي واللي الشركات المصرية عاملة إنجازات ضخمة وبتساهم في إعادة الإعمار وكمان مشروعات الشركات المصرية في تنزانيا والكونغو ودول تانية كتير ودا لأن السوق الأفريقية سوق مفتوح للشركات والمنتجات المصرية وبيرحب بيها .
الرئيس السيسي كان ليه دور مباشر في تقوية العلاقات المصرية الأفريقية بعد ما كانت مهملة في العصور السابقة وفتح قنوات تعاون بلا حدود ودلوقتي فيه غزو اقتصادي مصري لأفريقيا للاستفادة من العلاقات دي..

طيب ايه حكاية المشروع السحري اللي هيقلب الموازين في افريقيا ؟

شوف حضرتك اكيد سمعت بمشروع طريق القاهره - كيب تاون .. ودا مشروع طريق دولي بيخترق القارة الأفريقية من أقصى الشمال في مصر إلى أقصى الجنوب في دولة جنوب افريقيا وبيمر ب9 دول فى القارة بداية من مصر مرورا بالسودان ثم إثيوبيا ثم كينيا ثم تنزانيا ثم زامبيا ثم  زيمبابوي وينتهي في جنوب أفريقيا بطول 10200 كيلومتر ومعروف إن مصر والسودان وكينيا وتنزانيا وبتسوانا وجنوب افريقيا دول شاطئية بتطل علي بحار وباقي الدول حبيسه لا تتطل علي بحار وعشان كده بتستخدم في تجارتها سواء صادرات أو واردات الطيران المكلف جدا وعشان كده بيعتبر المشروع منفذ رخيص لتجارة هذه الدول.

بالإنتهاء من المشروع البري التجاري هتكون مصر وجنوب افريقيا حلقة وصل لنقل البضايع بين أوروبا وآسيا إلى أفريقيا  وزيادة صادراتها إلى أفريقيا لتصل إلى 30 مليار دولار في خلال 3 سنين ويقدر  أي مستثمر نقل بضاعته لأي دولة من الدول اللي بيمر بيها الطريق في زمن قياسي لا يزيد عن أيام على نقلها عن طريق البحر وتفريغها وإعادة شحنها بريا للدول الحبيسة ودا بياخد شهور ودا بيخلي نقل المنتجات مكلف جدا وغير مجدي اقتصاديا.
واكيد حضرتك خد بالك من رقم ال30 مليار دولار اللي هيدخل مصر من الصادرات لقلب افريقيا ودا غير رسوم خدمات نقل منتجات الدول التانية لأفريقيا لأن مصر ساعتها هتكون البوابة الرئيسية الشمالية لدول وسط افريقيا ودا هيعزز تحول مصر لمركز تجاري عالمي وغير أن المشروع هينعش الصناعة المصرية بشكل كبير وفي المستقبل الطريق الجديد هيكون شريان حياة وتجارة وتدفق السياحة كمان.