تطور جديد حصل في ملف قرض صندوق النقد الدولي لمصر.. خليكم معانا نشوف اللي حصل.. فاكرين طبعا إن لجنة صندوق النقد الدولي كانت موقفة الشريحة الرابعة من القرض الاجمالي بقيمة 8 مليار دولار اللي اتفقت عليه مع الحكومة المصرية قبل كده والحقيقة الصندوق خد وقت في الموافقة على صرف الشريحة الرابعة لأسباب خاصة بمراجعة برنامج الاقتصاد المصري وأسباب فنية تانية خاصة باجتماع وجدول أعمال المجلس التنفيذي اللي بيقر الصرف والموافقة النهائية.
الجديد في الموضوع إن الدكتور محمد معيط وزير المالية السابق واللي مسك منصب مهم جدا في الصندوق وهو المدير التنفيذي بصندوق النقد الدولي قال باعتباره مسئول دلوقتي في الصندوق إن المراجعة الرابعة لبرنامج التمويل بين الصندوق ومصر على مستوى الخبراء انتهت بنجاح وقال كمان إنه باقي بس تحديد معاد اجتماع المجلس التنفيذي واللي هيكون قريب جدا لانتهاء المراجعة رسميا وصرف الشريحة الرابعة اللي بتوصل مليار و200 مليون دولار.
معيط شرح أسباب بطيء صندوق النقد في صرف الدفعات المالية في القرض وقال إن دا بسبب خوف الصندوق من حالة من عدم اليقين والقلق الشديد والخوف من تأثير الأوضاع الاقتصادية والسياسية على الدول النامية والأسواق الناشئة.
أهمية صرف الشريحة الرابعة من القرض المصري طبعا في إنها هتعزز الثقة الدولية في الأسواق المصرية وهتجذب مزيد من الاستثمارات الأجنبية لأن صرف الشريحة معناها شهادة ثقة من صندوق النقد الدولي في السوق المصري ودا بيكون ليه تأثير مباشر على تدفق الاستثمارات المباشرة وغير المباشرة لأن في النهاية المستثمر بيدور على أسواق مستقرة وآمنة بجانب جاهزية الدولة لاستقبال الاستثمارات وعمل المشروعات بداية من الطريق اللي هيمشي عليه لغاية المواني اللي هيصدر منها والبنية الرقمية والتحتية اللي قدرت مصر تنجزها على مدار السنين اللي فاتت.
وكمان موقف صندوق النقد الايجابيس من اي دولة بيكون عامل أساسي في تصنيف اقتصادها للأفضل ودا معناه دفعة قوية في الاستثمار المباشر وتدفق الأموال الساخنة واللي مصر استقبلت منها مليارات الدولارات وحسب البنك المركزي المصري وصل صافي تدفقات الاستثمار الأجنبي المباشر في مصر 46.1 مليار دولار بنهاية العام المالي اللي فات 2023-2024 وعملت توزان في سعر صرف الدولار قدام الجنيه في الفترة الأخيرة ودا غير الزخم الاقتصادي مع الاعلان عن كل مشروع جديد في السوق المصري.
علاقة مصر بصندوق النقد والتقرير اللي بتصدر عن مؤسسات التمويل كانت السبب في صدور تقرير ايجابية مهمة جدا في الفترة الأخيرة وكان أخرها تقرير وكالة فيتش عن الجنيه المصري وتصدره العملات الافريقية واستدلت في حيثيات صعود الجنيه وقوته على نجاح برنامج صندوق النقد الدولي في مصر واللي فتح الطريق للاستثمار في الأسواق المحلية المصرية وزاد من ثقة المال الأجنبي في مصر وعزز الموارد الدولارية.
0 تعليق