البنية التحتية هيا عصب الاقتصاد الوطني لاي دولة في العالم.. وده اللي عملته مصر من زمان.. ياتري مصر استفادت اية من البنية التحتية الكبيرة اللي عملتها السنين اللي فاتت.. وهل الاقتصاد المصري استفاد من الكباري والطرق اللي اتعلمت علي مدار السنين دي كلها.

الفترة اللي فاتت الدولة سخرت كل امكانايتها لتشييد البنية التحتية، وعملت بنية تحتية تشيل الدولة المصرية لسنين طويلة، وهيا اللي كانت السبب الأساسي في اي نهضة اقتصادية البلد موجودة فيها دلوقتي أو في السنين اللي جاية، وهيا السبب الرئيسي في الاستثمارات الخارجية اللي بتوصل لمصر كل يوم علشان تبني مشروعات جديدة تكون سبب في زيادة الصادرات المصرية للخارج وتقلل من فاتورة الاستيراد.

طيب ازاي مشروعات البنية التحتية اللي قامت بيها الدولة خدمت الاستثمار حاليا؟. 
مصر في الوقت الحالي بقت قبلة المستثمرين وهدف رئيسي للاستثمار الأجنبي في كل المجالات، وفي السنين اللي جاية الاقتصاد المصري هيكون في حته تانية خاصة خالص، والسبب الاساسي في سيل الاستثمارات الكبيرة دي هو البنية التحتية الموجودة في البلد دلوقتي، واللي بتخدم بشكل رئيسي علي علي الاستثمار.

في السنين اللي فاتت مصر نفذت اكبر بنية تحتية في تاريخها في كل المجالات وبنت طرق وكباري وعملت مطارات ومؤاني، وشبكة كهربائية جديدة، وكل الاستثمارات اللي بتوصل مصر بتكون اعتمادها علي البنية التحتية اللي قاتت بيها مصر علي مدار السنين اللي فاتت سواء في النقل والتصدير ، وانتاج وبيع الكهرباء واللي هيا السبب في تشغيل المصانع اللي دخلت مصر ، والطرق والكباري هيا الوسيلة اللي المستثمرين بيستخدموها علشان يصدروا بضائع للعالم. 

البنية التحتية اللي عملتها الدولة خلت الحكومة تحط خطة لتحويل مصر لمركز اقليمي في التبادل التجاري وتبادل الطاقة، وبتأسس نفسها أنها تكون مركز للصناعات الرئيسية في العالم بداية من الصناعات اللي بيكون انتاجها مخصص للسوق المحلي أو الصناعات الثقيلة واللي بيكون اغلب انتاجها مخصص للتصدير الخارجي، وشوفنا في الفترة الأخيرة أنواع كتيرة من الصناعات دخلت السوق المصري مكانتش موجودة قبل كده زي صناعة السيارات والهواتف المحمول وغيرها من الصناعات المعقدة واللي كانت صعب جدا تكون موجودة في مصر لولا وجود بنية تحتية لدخول النوع ده من الصناعات.