يا ترى  إزاي مصر ممكن تبني صناعة قوية تقوي اقتصادها وتضمن مستقبلها؟ وليه الرئيس السيسي مركز اوي مع الصناعة ؟ زايه المشروعات اللى الدولة بتوليها أهمية كبيرة؟ وإزاي كل ده هيأثر على حياة الناس؟

مصر مؤخرا مش بتشتغل بس على مشاريع صناعية.. لأ.. دي بتخطط لمشروعات عملاقة هتغير شكل الاقتصاد المصري تماما.. وكل ده في إطار استراتيجية ضخمة بتديرها وتنفها  الحكومة عشان توصل للصناعة القوية اللى تستحقها.

والرئيس عبدالفتاح السيسي مهتم بالملف ده شخصيا وتقدر تقول كده بيشرف عليه بنفسه واختار ليه واحد من أهم رجاله الفريق كامل الوزير.

وخد بالك ..مصر مش بس بتعمل مشروعات جديدة لكن كمان بتبني مدن صناعية ضخمة.. زي مدينة الجلود في الروبيكي اللي بتعتبر أكبر مدينة متخصصة في الجلود في المنطقة.. ومصانعها مش بس بتعزز الإنتاج المحلي لكن كمان بتفتح فرص تصدير جديدة للأسواق العالمية.

غير كده.. عندك مدينة "جيبتو فارما" أكبر مدينة صناعية في الشرق الأوسط لإنتاج الأدوية..و دي بتعتبر نقطة تحول هامة لأن حجم الإنتاج هيوصل لـ150-200 مليون عبوة سنويًا وده هيخلي مصر مركز عالمي لصناعة الأدوية..  تخيل معايا الأثر الكبير ده على الاقتصاد المصري لو بدأنا نصدر أدوية لكافة الأسواق في المنطقة والعالم.

كمان الدولة شغالة على  الاستراتيجية الوطنية للصناعة 2030.. لأن  مصر مش بس بتفكر في الحاضر، لكن كمان بتضع خطة مستقبلية لزيادة مساهمة القطاع الصناعي في الناتج المحلي الإجمالي من 14% لـ20% بحلول 2030.. وده معناه فرص عمل جديدة وزيادة الإنتاجية وتحقيق الاكتفاء الذاتي في العديد من الصناعات اللي كنا بنعتمد فيها على الواردات.

وما ننساش المبادرات اللي الدولة أطلقتها زي "ابدأ" لتطوير الصناعة المصرية..  المبادرة دي مش بتدعم بس الصناعات المحلية.. لكن كمان بتستهدف تقليل الواردات وفتح مجالات جديدة للشركات الصغيرة والمتوسطة لتوطين التكنولوجيا والابتكار في الصناعات المحلية

طب ايه  تأثير المشروعات دي على الاقتصاد؟

ببساطة المشاريع دي هتخلي الصناعة المصرية أكثر تنافسية في الأسواق العالمية.. إحنا مش هنعتمد على الواردات وده هيوفر عملة صعبة لمصر وهيزود الصادرات بنسبة كبيرة زي ما حصل مع زيادة الصادرات الصناعية بزيادة 73.8% في 2023 مقارنة بـ2014.

كمان مع تنفي الخطط ديكلها .. الاقتصاد المصري هيكون أكثر استقرارًا ومرونة لأنه هيعتمد على قاعدة صناعية محلية قوية قادرة على مواجهة أي تحديات اقتصادية مستقبلية..و زيادة الاستثمارات في الصناعات التحويلية والتوسع في إنشاء المدن الصناعية هيساعد في توفير فرص عمل ضخمة للشباب المصري وهيساهم بشكل كبير في تقليل معدلات البطالة.

طبعًا مش هننسى المبادرات اللي بتدعم القطاع الصناعي زي مبادرة تمويل المستثمرين الصناعيين لشراء الآلات والمعدات وتيسير سداد مديونيات الغاز للمستثمرين… كل ده مش هيخلي مصر فقط مركزًا صناعيًا في المنطقة لكنه كمان هيساهم في رفع الكفاءة الإنتاجية بشكل ملحوظ.

الخلاصة .. مصر مش بتشتغل على تطوير الصناعة بس هي بتخطط لمستقبل اقتصادي مستدام ولو استمرينا في الاتجاه ده.. هنشوف مصر واحدة من أقوى الاقتصادات في المنطقة.. والفضل كله في المشروعات العملاقة اللي بتتعمل دلوقتي.