يا ترى السعر العالمي للدهب رايح فين ؟ وهل المعدن النفيس هيواصل قفزاته الكبيرة ولا فيه امل الأسعار تتراجع شوية ؟ وايه تاثير اللى بيحصل عالميا على سوق الدهب فى مصر؟ وهلن الوقت الحالي مناسب للشراء ولا الأفضل الانتظار شوية؟

في الفترة الأخيرة أسعار الدهب العالمية شهدت  تقلبات ملحوظة.. وفى اخر تعاملات ارتفع الدهب بنسبة 0.6% ليصل إلى حوالى  2914 دولار للأوقية. الزيادة دي كانت نتيجة لحالة عدم اليقين بسبب سياسات التعريفات الجمركية اللي أعلنها الرئيس الأمريكي دونالد ترامب واللي أثارت مخاوف من حروب تجارية عالمية.

توقعات المؤسسات المالية الكبرى بتشير لاستمرار الاتجاه الصعودي لأسعار الدهب.. عندك مثلاً بنك جولدمان ساكس رفع توقعاته لسعر الذهب إلى 3100 دولار للأوقية بحلول نهاية 2025  وأكد انه هيكون فيه زيادة فى  الطلب من البنوك المركزية على الدهب.

جولدمان ساكس ييقدر أن الطلب الأعلى هيكليا من البنوك المركزية هيزيد سعر الدهب 9% بحلول نهاية العام.. وده بيقترن بتعزيز تدريجي لحيازات الصناديق المتداولة مع انخفاض أسعار الفائدة على الأموال.

طب ايه تأثير الأسعار العالمية على السوق المصري؟

الأسعار العالمية للدهب بتأثر بشكل مباشر على السوق المصري والنهاردة سجل سعر جرام الدهب عيار 21 في مصر حوالي 4105 جنيهات.. الزيادة دي بترجع للتغيرات في الأسعار العالمية بالإضافة لتقلبات سعر صرف الجنيه المصري مقابل الدولار الأمريكي

نيجي لسؤال مهم..  هل الوقت مناسب للشراء أم الانتظار؟

القرار بالشراء أو الانتظار بيعتمد على عدة عوامل أخمخا التوقعات المستقبلية.. ومع التوقعات بزيادة أسعار الدهب عالميًا الشراء في الوقت الحالي ممكن يكون استثمار جيد على المدى الطويل.. كمان من الحاجات اللى بتحدد قرارك الميزانية الشخصية.. لازم تحدد قدرتك المالية وتقرر إذا كان الاستثمار في الدهب مناسب ليك حاليًا مع متابعة السوق لأن الأسعار بتتغير باستمرار فمتابعة التحديثات اليومية هتساعدك تاخد قرار سليم.

بس لو ناوي اساثمر فى الدهب خلينى اقولك شوية نصايح مهمة جدا .. اولها انك لازم  تحدد الهدف من الشراء.. هل هو للاستثمار طويل المدى ولا للاحتفاظ بالقيمة.. لو طويل المدى الأفضل تشترى دهب حاليا لن معظم التوقعات بتقول انه هيكون فيه زيادات كبيرة فى سعر المعدن النفيس .. ولازم كمان تتيابع الأخبار الاقتصادية.. لأن التغيرات في السياسات العالمية والأحداث الاقتصادية الكبرى بتأثر على أسعار الدهب.. وكع كل ده لازم  استشارة الخبراء والاستعانة بآراء المتخصصين لأنها  ممكن تساعدك في اتخاذ قرار أفضل.

واللى لازم تبقا عارفوا ان الاستثمار في الدهب دايمًا كان ملاذ آمن في أوقات عدم الاستقرار الاقتصادي.. ومع التوقعات بزيادة أسعاره.. الشراء حاليًا ممكن يكون خطوة ذكية لكن القرار النهائي لازم يكون مبني على دراستك الشخصية ومتابعتك للسوق.