ايه اللي بيحصل في قطاع السياحة المصرية والأرقام هتوصل لكام في موسم 2025 وإيه المفاجأة اللي كشفت عنها شركات السفر العالمية لمصر وتأثيرها على الدعاية والسفر والتوافد على السوق المصري.

زي ما قلنا قبل كده كتير إن السياحة المصرية هي قاطرة الاقتصاد المصري لأنها بتشغل قطاعات اقتصادية كتير وصناعات مغذية وبتشغل ملايين الشباب ودا غير العملة الصعبة اللي بتدخلها للبلد وقطاع السياحة حقق موسم كبير وناحج وقياسي في 2024 بأكتر من 15 مليار دولار واستقبلت حوالي 16 مليون سائح في رقم جديد.

كل المؤشرات بتقول إن السياحة في مصر هتر وح في حتى تانية لأسباب كتير منها البنية التحتيبة الحديثة والتطوير اللي حصل في المناطق السياحية والافتتاح التجريبي للمتحف المصري الكبير وقبله متحف الحضارة والتجلي الاعظم  وغير مشروعات الساحل الشمالي والفنادق الجديدة وغيرها من عشرات المشروعات اللي هتنقل السياحة المصرية لموسم تاريخي في 2025.

المفاجأة واللي أكدت الكلام اللي احنا بنقوله كان تقرير صدر النهاردة من شركة كينسينجتون" المتخصصة في السفر الفاخر واللي كشفت  عن عودة السفر الفردي بقوة في  2025،  وكشفت بيانات التقرير أن 76% من المسافرين الأثرياء مستعدون لرحلات دولية بمفردهم خلال ال3 سنين اللي جاية.

مصر كانت مفاجأة التقرير ودا بعد ما وصلت إلى المرتبة الرابعة عالميا كأفضل وجهة للسفر الفردي، متفوقة على دول كبرى في السياحة الفردية زي تايلاند وأستراليا إسبانيا.

أيسلندا وفرنسا ونيوزيلندا ودا بفضل تنوعها بين الآثار الفرعونية، وشواطئ البحر الاحمر البحر والساحل الشمالي وتجارب الصحراء الساحر.

وفي استطلاع لـ كينسنجتون أشار 80% من الأثرياء إلى استعدادهم للسفر لمسافات أبعد للحصول على تجارب فريدة ودا بيعزز مكانة الوجهات غير التقليدية وكشف التقرير ارتفاع إنفاق الأثرياء على الخدمات الفاخرة بنسبة 159% منذ 2019، مع تفضيل 93% منهم دفع مبالغ إضافية للتجارب الخاصة الفاخرة ووجت الرحلات النيلية على رأس قائمة الخيارات الأكتر طلبا ودا بعد تأكيد 72% من المشاركين في الاستطلاع رغبتهم في استكشاف آثار مصر القديمة عبر "كروز خاص"، في الوقت نفسه حققت خدمات اليخوت والڤيلات نمو بنسبة 98% و39% على التوالي.

ببساطة تقرير الشركة العالمية المتخصصة في مجال السفر الفاخر والسياحة إن مصر احتلت المركز الرابع عالميا في الوجهات اللي الاثرياء ناويين يزروها في 2025 ودا معناه إن هيكون فيه ايرادات ضخمة للسياحة المصرية ودا بسبب الانفاق الكبير من الاثرياء في رحلاتهم واللي بتكون عامل أساسي في ايرادات الدولة من السياحة وفي نفس الوقت ارتفاع نصيب مصر من النوع دا بيكون دعاية مجانية لأن رجال الأعمال والمليارديرات في العالم مش بيروحو اي منطقة وخلاص لكن لازم تتوافر فيها عامل الاستقرار والترفية والاستمتاع ودي دعاية إضافية لمصر.