إنت متخيل إن في 2025 ولسه في ناس بتقع في فخ النصب الإلكتروني؟! إزاي بعد كل القضايا اللي سمعنا عنها وكل المستريحين اللي وقعوا وكل التحذيرات اللي طلعت لسه في ناس بتحط فلوسها في منصات وهمية وتصدق أحلام الربح السريع؟.. والسؤال الأهم.. إزاي وإحنا عندنا بنوك ومؤسسات مالية معروفة بتأمّن فلوسك لسه في حد بيجري ورا ناس مش معروفة ولا لها أي ترخيص رسمي؟! ولا هو الطمع بيغمي العيون؟
الواقعة الأخيرة اللي هزت مصر الأيام اللي فاتت هي قصة منصة "FBC" للنصب الإلكتروني.. خدوا فلوس الناس ووعدوهم بمكاسب خرافية وآخر حاجة.. المنصة اختفت، والفلوس طارت.
منصة "FBC" بدأت تشتغل في مصر من فترة على إنها "استثمار رقمي مضمون"، وفضلت توسّع نشاطها وتكسب ثقة الناس، لحد ما بقى عندها عدد مهول من المشتركين، وكل واحد فيهم كان مستني أرباح وهمية بمعدلات غير منطقية.. وطبعا كالعادة الطمع لعب دوره والناس كانت بتضخ فلوس أكتر وأكتر.
بس القصة دي خدت منحنى غريب قبل ما تحصل الكارثة.. الناس اللي شغالة في المنصة وقبل أيام قليلة من إغلاقها، عملوا حاجة غريبة جدًا.. جمعوا المستثمرين في حفلة عشاء في كورنيش إمبابة! وقالولهم: "زودوا استثماراتكم، هتزودوا أرباحكم.. وهاتوا ناس معاكم، علشان كلنا نكسب!" وفعلا ناس كتير صدقت الكلام وضخت مبالغ كبيرة.. لكن بعدها بأيام، فجأة المنصة قفلت.. والمسؤولين اختفوا!
أول ما الناس حاولوا يسحبوا فلوسهم، اتقال لهم إن المنصة اتعرضت لهجوم سيبراني وإن كل حاجة هترجع خلال ساعات.. بس الساعات بقت أيام والأيام بقت أسابيع.. والنتيجة صفر.
ناس كتير راحت تبلغ في الشرطة، وفيه بلاغات اتحررت، وفعلا تم القبض على واحد من المسؤولين في محافظة البحيرة، لكن الفلوس؟ راحت.. وضاعت على أصحابها.
السؤال المهم إزاي لسه الناس بتقع في الفخ؟
الغريب مش إن المنصة نصبت.. لأننا شوفنا كتير قبلها من المستريحين، لحد "فوركس الغلابة"، ومشاريع وهمية زي "كيو نت" وغيرها.. الغريب هو إن لسه في ناس بتقع ولسه في ناس مش بتتعلم الدرس.. لأن فكرة الربح السريع مغرية.. محدش عايز يستنى الكل عايز فلوسه تتضاعف في أيام وده مدخل النصب الأول.
لكن اللي ناس كتير مش بتفكر فيه هو إن مفيش استثمار حقيقي بيحقق أرباح ضخمة في وقت قصير من غير مخاطر ولو في حد بيقولك كده فاعرف إنك داخل على كارثة.
طيب، إيه البديل؟
مش عارف الناس ليه بتغامر بفلوسها في أماكن غير موثوقة وإحنا عندنا قطاع مصرفي قوي في مصر.. البنوك بتوفرلك استثمار آمن، شهادات استثمار، حسابات توفير، وصناديق استثمارية.. كلها حلول شرعية تحت رقابة البنك المركزي، وفلوسك فيها محمية، مش معرضة للنصب والسرقة.
فلو معاك مبلغ وعايز تستثمره، روح للبنوك، اسأل المختصين، خد نصيحة من حد فاهم.. لكن ، بلاش تجري ورا أي حد على السوشيال ميديا بيقولك "الفرصة اللي مش هتتعوض"! لأن الغالب.. إن الفرصة دي هي اللي هتضيعك.
الدرس اللي لازم الناس تفهمه، إن مفيش حاجة اسمها "ربح سريع مضمون".. ولو كان كده، كان النصاب نفسه استثمر فلوسه بدل ما يلم فلوسك.. الفلوس مش لعبة، حافظ على تعبك، واتعلم من أخطاء غيرك.. علشان ما تلاقيش نفسك بتقول بعد فوات الأوان: "يا ريتني سمعت الكلام!
0 تعليق