إيه حكاية المليارات اللي بتكسبها مجموعة طلعت مصطفى من القطاع العقاري وايه حكاية سوق المليارات المفتوحة في مصر وازاي الحكومة تقدر تعمل ثروة ضخمة وبالدولار من قطاع واحد.. 

لو حضرتك متابع اقتصاد يبقي اكيد قريت بيان مجموعة طلعت مصطفى الشهيرة في قطاع البناء والتشييد والعقار الفاخر والكمبوندات  وعرفت انها حققت مبيعات ب 504 مليار جنيه في 2024  يعني نمسك الخشب لأن الرقم دا بيساوي 10 مليار دولار ودا اكبر  3 أضعاف من قيمة مبيعاتها في 2023 ودا بعد ما باعت 29 ألف وحدة مقابل 17 ألف في سنة 2023... طبعا الأرقام دي بتودينا لمنطقة مهمة جدا وهو مستقبل سوق العقار في مصر وخاصة في الأيام دي وازاي التوقعات بتقول إن مصر ممكن تعمل ثروة غير مسبوقة عن طريق الاستثمار في العقارات.

طيب ليه سوق العقارات والبناء بقي الحصان الرابح في القطاعات الاقتصادية؟

هنقول لحضرتك.. الإجابة باختصار إن مصر بقت بلد جاذبة للاستثمار الأجنبي بشكل غير مسبوق والعقار جزء مهم في استثمارات الأجانب والعرب في اي سوق لأن الأرباح بتاعته كبيرة وفي نفس الوقت الطلب عليه في زيادة مستمرة وبيعتبر  أكبر قطاع ربحا مع الدهب ومصر بدأت الطريق الصحيح في الاستثمار العقاري مع بناء أكبر شبكة بنية أساسية في المنطقة وأفريقيا لأن من غير بنية أساسية من طرق ومحاور وكهرباء وغاز واتصالات القطاع العقاري هيموت وبالتزامن مع تشييد البنية التحتية القوية مصر نفذت مشروعات عقارية عالمية في العلمين الجديدة وفي الساحل الشمالي والبحر الأحمر وبنت المدن الجديدة والذكية ومع الطفرة الاقتصادية والمشروعات السياحية انتعشت الاستثمارات في القطاع الفندقي والسياحي والإسكان الفاخر خاصة بعد زيادة الطلب على العقار المصري من الخارج واللي بقي يتباع بالدولار وهو المعروف باسم تصدير العقار.

كمان مصر بقت مهجر وارض جديدة لمليارديرات العالم من حيث التملك في مصر أو التوسع في الاستثمار أو السياحة والترفيه ودا أنعش بردو سوق العقارات الفاخرة في السوق المصري وبقينا نسمع عن منازل ومنتجعات الأثرياء الأجانب والعرب في مصر.. 

ولو هنرجع للأرقام هنلاقي ان حجم السوق العقارية المصرية حاليا 3.6 تريليون جنيه مصري وفق لأخر إحصاء في 2023 ، يعني نقدر نقول أن النسبة دلوقتي 4 تريليون جنيه تقريبا وبتشكل العقارات السكنية أكبر حصة من السوق المصرية واللي  بلغت قيمتها 2.5 تريليون جنيه في 2023  وبعدها العقارات  التجارية في المرتبة التانية بقيمة تريليون جنيه والتوقعات بتقول إن السوق العقاري المصري هيوصل 6 ترليون جنيه تقريبا في 2028 ..

وكفاية نعرف إن حجم صادرات العقارات عالميا بيوصل لحاجز الـ250 مليار دولار سنويا ومصر بتستهدف مزاحمة كبار الدول فى القطاع المتنامى دا بفضل المزايا اللي قلنا عليها وعشان كده الدولة قدمت تسهيلات وحوافز جاذبة للراغبين فى شراء العقارات من خارج البلاد لأن الدفع بالعملة الصعبة ومصر نجحت في تجاوز أزمة الدولار عن طريق مبادرة بيع العقارات والأراضي بالدولار ..

وبالارقام بردو فيه تقديرات رجحت وصول حجم سوق البناء المصرية لنحو 50.78 مليار دولار خلال العام 2024، وسجلت صادرات مواد البناء المصرية حوالي 5.6 مليار دولار، خلال أول 7 أشهر من العام الحالى، بنسبة نمو تقدر بـ16%، وتسهم مشروعات القطاع العقارى بنسبة 20% من إجمالى الناتج المحلى فى مصر وبلغت 124 مليار جنيه بنهاية عام 2023.

طيب ليه بنقول على سوق العقارات بسوق المليارات المفتوحة.. لانه باختصار سوف مفتوح وواسع ومليان فرص ومصر كلها بقت مناطق جاذبة للاستثمار والتعمير والترفيه وعندها اماكن ساحرة على طول شواطئها وفي المدن الجديدة وكلها بتمثل فرص واعدة ومفتوحة للمستثمرين.