هو إيه اللي بيحصل بين مصر والكويت اليومين دول؟ وايه حكاية مليارات الدولارات اللى بتتحرك  والزيارات اللى على أعلى مستوى، والصفقات الاقتصادية الكبيرة اللي جاية في الطريق.. وليه الكويت مهتمة أوي كده بمصر؟ وحجم التعاون ده هيوصل لفين؟

د

أول حاجة لازم نكون عارفينها ان العلاقة بين مصر والكويت مش جديدة.. دي علاقة تقدير ومحبة اقتصادية وسياسية من زمان أوي بين أخوات شايفين بعض في كل محنة وكل فرحة..  والنهاردة بنتكلم عن طفرة حقيقية في العلاقات دي.. الدكتور مصطفى مدبولي رئيس الحكومة قالها صراحة من يومين في مؤتمر صحفي: 'العلاقات بين القاهرة والكويت فيها قفزة كبيرة جدًا، والجاي أحلى".

وده مش كلام في الهوا.. لأن الراجل لسه راجع من زيارة للكويت.. قابل فيها أمير البلاد الشيخ مشعل الأحمد الجابر الصباح، وولي العهد، ورئيس الوزراء الكويتي الشيخ أحمد عبدالله الأحمد الصباح.. قابل كل القيادات دي وكلهم متفقين إن التعاون الاقتصادي لازم ياخد خطوة لقدام.

طب إيه اللي جاي وايه التعاون اللى هيحصل بين البلدين؟

مدبولي قالها واضحة.. الشيخ أحمد رئيس وزراء الكويت.. هيزور مصر قريب جدا.. ومش هييجي لوحده.. هيجيب معاه كام مشروع اقتصادي واستثماري كبير ..  يعني إحنا قدام صفقات جديدة هتساهم في نهوض الاقتصاد المصري.

بس السؤال اللي بيطرح نفسه.. الكويت عاوزة تستثمر في إيه بالظبط في مصر؟
الكويت عينها على قطاعات كتيرة في مصر.. أولها السياحة.. الكويتيين عارفين إن مصر فيها كنز سياحي مش موجود في حتة تانية..  فبيفكروا يضخوا فلوس في فنادق ومنتجعات جديدة… تاني حاجة العقارات.. السوق العقاري في مصر بينمو كل يوم والكويت عاوزة تكون جزء من النهضة دي.. تالت حاجة.. الطاقة والكهرباء.. الكويت شايفة إن مصر بقت مركز للطاقة المتجددة في المنطقة.. وده مجال واعد جدًا.. وطبعًا الصناعة والزراعة مش بعيد عن عينهم خصوصًا إن مصر بتحاول تزود الصادرات بتاعتها والكويت عاوزة تكون شريك في النجاح ده

طب حجم التعاون التجاري بين مصر والكويت دلوقتي قد إيه؟

الاستثمارات الكويتية في مصر وصلت لحد دلوقتي لأكتر من 20 مليار دولار على مر السنين حسب آخر التقارير.. وفي الربع الأول من السنة المالية 2024-2025، مصر استقبلت 2.7 مليار دولار استثمارات مباشرة من دول كتير والكويت كانت من أكبر المساهمين في الرقم ده. و التبادل التجاري بين البلدين كمان بيزيد كل سنة وفي 2023 كان حوالي 3 مليار دولار ودلوقتي متوقع يقفز أكتر مع الصفقات الجديدة
لكن ليه الكويت مهتمة أوي بمصر كده؟

السر في كام حاجة… أولاً مصر بالنسبة للكويت زي الأخت الكبيرة اللي دايمًا كانت موجودة في وقت الضيق.. الشيخ مشعل قالها بنفسه لمدبولي: 'مصر وقفت جنبنا من أول يوم في نهضتنا، وإحنا مش هننسى ده'. يعني فيه ودّ قديم وتاريخ مشترك بيخلّي الكويت شايفة إن استقرار مصر هو استقرار ليها… ثانيًا، السوق المصري نفسه مغري جدًا.. 100 مليون مواطن.. اقتصاد بينمو.. وبنية تحتية بتتطوّر كل يوم.. ده غير الموقع الاستراتيجي بتاع مصر اللي بيخلّيها بوابة لأفريقيا وأوروبا.

والسبب التالت والأهم.. الكويت عاوزة تنوّع استثماراتها بعيد عن النفط، ومصر بالنسبة لها فرصة ذهبية تحقق الهدف ده.. الشيخ مشعل أمر حكومته صراحة إنهم يزوّدوا الاستثمارات مع مصر وده معناه إن إحنا قدام موجة فلوس كويتية كبيرة جاية على مصر في الشهور الجاية.