قال إمام عاشور لاعب النادي الأهلي، بأنه يتعلم دائما من أخطائه ويتعلم من اللاعبين الكبار داخل النادي الأهلي بشكل مستمر وهذا الأمر لا يقلل من قيمة اللاعب نهائيا، ويستعرض موقع تحيا مصر تصريحات إمام عاشور.

تصريحات إمام عاشور

وأضاف إمام عاشور في تصريحاته في بودكاست القلعة الحمراء مع سيد عبد الحفيظ، اتعلمت الالتزام في الأهلي والتمرين بشكل كويس والتركيز في المباريات، وفيه حاجات كتير مكنتش أعرفها قبل الأهلي.

وزاد إمام عاشور، شخصيتي دايما بيكون عندي رد فعل بشكل سريع وبعمل كل حاجة تريحني دايما سواء القرار صح أو غلط ولازم أكون مقتنع بيه ومش بركز مع أي حد ممكن يقول ده صح أو غلط، وفي الأول مكنتش بسمع لأي حد وفي الوقت الحالي بسمع لناس كتير.

وأكمل إمام عاشور، بسمع لوالدي ووالدتي حاليا ومراتي وأخواتي وفي النادي الأهلي والناس كانت واخدة عني فكرة أني مبحبش أتكلم مع حد وفهموني بشكل كويس، وكان فيه لاعب رايح يشتري عربية مع شخص زميلة وهو بيشتريها بيقوله العربية دي أوريجينال ولا مش أوريجينال.

إمام عاشور مع سيد عبد الحفيظ

واستكمل إمام عاشور، أتأثرت بشكل إيجابي بمنظومة النادي الأهلي والسيستم ومجلس الإدارة وكل واحد في النادي الأهلي عارف شغله واللاعيب لاعيب والمدرب مدرب ودا بيريحني والتركيز يكون في المباريات فقط، وعندنا قائد في الفرقة وهو محمد الشناوي والنادي الأهلي بيجبرك أنك تحافظ على نظام الأهلي والأهلي مش بيقف على أي حد واللي يخرج أسرار النادي يمشي على طول.

واختتم إمام عاشور تصريحاته، أنا مبحبش ألف وأدور وتركيزي دايما بيكون مع الفريق، وتعرضت لمواقف صعبة في كرة القدم ودايما كنت بنتهز الفرصة وكان عندي دافع بشكل مستمر وكنت عاوز أفرح والدتي دايما لأنها تعبت معايا كتير.