هو إزاي الاحتياطي النقدي فى البنك المركزي بيزيد كل شوية وفى نفس الوقت فيه ناس بتتكلم عن أزمة فى توفير العمل الصعبة؟ وايه معنى زيادة الاحتياطي النقدي للدولة ؟ وايه تأثيره على حياة الناس فى مصر؟ وليه الاحتياطي قفز فى الفترة الأخيرة بشكل كبير؟

فااصل فى الساعات الأخيرة البنك المركزي المصري أعلن إن احتياطي النقد الأجنبي وصل لـ47.394 مليار دولار بنهاية فبراير 2025..  بزيادة 129 مليون دولار عن يناير اللي قبله.. يعني في شهر واحد بس احتياطي العملة الأجنبية زاد بمقدار حلو.

وهنا بييجي سؤال مهم هو ايه احتياطي النقد الأجنبي ده ؟

احتياطي النقد الأجنبي ببساطة .. هو الأموال بالعملات الأجنبية اللي موجودة في خزنة البنك المركزي.. يعني الدولارات واليورو والعملات التانية اللي بيحوشها البلد زي ما إنت بتحوش فلوسك في المحفظة.. بس طبعاً مش فلوسك الشخصية دي فلوس الدولة اللي بتستخدمها في حاجات كبيرة.

الاحتياطي ده بيتكون من سلة عملات عالمية زي الدولار الأمريكي، اليورو، الجنيه الإسترليني، الين الياباني، واليوان الصيني، بالإضافة لجزء من الدهب.. والبنك المركزي بيظبط النسب دي حسب سعر الصرف واستقرار العملات في السوق العالمي.

طب الفلوس دي بتعمل إيه؟ الحكومة بتستخدمها في ايه يعني؟

تخيل كده إنك في بيتك وعايز تشتري أكل وأدوية وتحوش كمان .. الاحتياطي ده هو اللي بيأمن احتياجات البلد الأساسية.. يعني لما نستورد قمح عشان نعمل العيش.. أو بنزين عشان نفول العربيات.. أو أدوية عشان نعالج المرضى.. الفلوس دي بتطلع من الاحتياطي.. مش بس كده لما ييجي ميعاد سداد قسط دين خارجي أو فوايد عليه الاحتياطي هو البطل اللي بينزل يحل المشكلة.

ةلما احتياطي النقد الأجنبي يزيد زي ما حصل في فبراير 2025، ده  معناه إن البلد عندها حصالة أكبر من العملة الصعبة.. يعني الدولار واليورو وكده بقوا متوفرين أكتر.. وده بيخلّي توافر العملة الأجنبية في السوق أحسن.. يعني البنوك والشركات هيلاقوا دولارات أسهل لما يحتاجوها.. بدل ما يقعدوا يستنوا أو يدوروا في السوق السودا.. الاحتياطي القوي بيسهل العملية دي.

لكن خلينا نكون صرحا مع بعض.. الزيادة الأخيرة اللي هي 129 مليون دولار مش هتغير الدنيا كلها في يوم وليلة.. لأن احتياجاتنا كبيرة أوي.. فاتورة الاستيراد بتاعتنا كل سنة بتبقى حوالي 70 مليار دولار..  يعني الـ47.394 مليار دولار دول يغطوا حوالي 6 أو 7 شهور من الاستيراد لو قعدنا نصرف منهم.. بس الزيادة دي بتدينا نفس أطول.. و بتخلينا نقدر نواجه أي أزمة اقتصادية مفاجئة زي ارتفاع أسعار السلع العالمية أو اضطرابات زي اللي حصلت في البحر الأحمر.

طب ايه تأثير ده على حياتنا؟

لما الاحتياطي يبقى قوي.. ده بيطمن الحكومة إنها تقدر توفر السلع الأساسية زي العيش والزيت والسكر من غير ما تقع في أزمة نقص دولارات.. كمان بيساعد في استقرار سعر الجنيه المصري قدام الدولار.. لأن لما البنك المركزي يكون عنده احتياطي كويس.. بيقدر يتدخل في السوق لو سعر الصرف بدأ يروح يمين وشمال.. يعني مش هنقول إن الدولار هيبقى بـ10 جنيه بكرة بس على الأقل الوضع هيبقى أكتر استقرار.

ولو بصينا على الصورة بشكل أوشع وأشمل.. الاحتياطي ده زاد في السنة الأخيرة بفضل حاجات كتير.. السياحة رجعت تقفز تاني وجابت حوالي 14 مليار دولار في 2024.. الصادرات السلعية كمان زادت لـ40 مليار دولار.. وتحويلات المصريين في الخارج لسه قوية.. صحيح إيرادات قناة السويس تراجعت شوية بسبب مشاكل البحر الأحمر لكن الحكومة لسه عينها على زيادة الاحتياطي أكتر خصوصاً مع الدعم من صندوق النقد الدولي والقروض الجديدة.