هو إيه اللي ممكن يخلي الدولار الأمريكي.. العملة اللي كلنا بنعتبرها أقوى حاجة في السوق.. يتراجع أسوأ تراجع أسبوعي ليه من سنتين ونص؟ وليه فجأة بنك زي "جيه بي مورجان"  واحد من أكبر الأسماء في وول ستريت يطلع يقول: "بيع الدولار على المكشوف دلوقتي"؟ وهل الاقتصاد الأمريكي فعلاً بيترنح بسبب فوضى الرسوم الجمركية؟ ولا في حاجة تانية كبيرة بتحصل ورا الكواليس؟

الدولار الأمريكي اللي كان دايماً بطل السوق.. أنهى الأسبوع اللي فات بنزول قوي جدًا.. بصراحة حاجة مكانتش متوقعة.. مؤشر بلومبرج  للدولار الفوري انخفض بنسبة 2.3%.. وده أكبر انخفاض أسبوعي من نوفمبر 2022.. يعني ببساطة.. الدولار خسر الأسبوع ده أكتر من أي وقت في أكتر من سنتين.

طب إيه السبب؟

اللي حصل إن سياسات الحمائية الأمريكية.. اللي بيقودها الرئيس الأمريكي دونالد ترامب.. بدأت ترجع تاني بقوة.. ترامب قال هيفرض رسوم جمركية على البضايع اللي جاية من برا.. وبعدين رجع أجل القرار ده.. المشكلة إن الحركة دي خلقت فوضى وعدم يقين في السوق.. والناس بدأت تقلق وتسأل هو فعلا الاقتصاد الأمريكي هيبطئ فعلاً بسبب الرسوم دي ولا لأ؟

واللي زاد الطين بلة إن بيانات سوق العمل الأمريكي طلعت يوم الجمعة ضعيفة شوية.. الناس شافت إن الاقتصاد مش قوي زي ما كان متوقع.. وده خلى الدولار ينزل تاني بنسبة 0.4% في يوم واحد.. حتى جيروم باول رئيس البنك الفيدرالي.. طلع قال "في حالة عدم يقين كبيرة في التوقعات دلوقتي.. بس احنا مش هنستعجل في تغيير السياسة النقدية" يعني هو حاول يهدي الناس.. بس السوق كان خلاص بدأ يشوف الدولار بعين تانية

نروح لنقطة تانية مهمة جدا.. ليه "جيه بي مورجان".. البنك العملاق أوصى ببيع الدولار على المكشوف لأول مرة من أكتر من سنة؟

اللي حصل إن الخبراء بتوع البنك كتبوا مذكرة يوم الجمعة وقالوا فيها: "السوق بيتغير.. ونظام أسواق الصرف الأجنبي اتشال كده واتقلب" هما شافوا إن الدولار بيفقد قوته الاستثنائية اللي كان متميز بيها عن باقي العملات.. وفي نفس الوقت أوروبا بدأت ترجع بقوة

يعني ببساطة.. "جيه بي مورجان" شاف إن الاقتصاد الأمريكي بيتراجع بسبب المخاوف دي.. وفي المقابل أوروبا.. خصوصاً ألمانيا.. بتزود خطط الإنفاق بتاعتها.. ده خلى اليورو يقفز 4.6% الأسبوع ده.. وده أفضل أسبوع لليورو من 2009.. فهما قرروا يغيروا استراتيجيتهم.. وبدال ما يراهنوا على صعود الدولار.. قالوا: "لا.. احنا هنبيع الدولار على المكشوف.. لأن الاتجاه دلوقتي هابط" ودي خطوة كبيرة.. لأنها بتدل إن حتى الكبار في وول ستريت بقوا متشائمين من العملة الخضرا

على الناحية التانية.. أوروبا بقت النجمة الجديدة في السوق.. خطط الإنفاق الدفاعي والاقتصادي الضخمة.. خصوصاً في ألمانيا.. عززت توقعات النمو هناك.. اليورو قفز.. والكرونة السويدية كمان كانت الأقوى في مجموعة العشرة.. وارتفعت 7% قدام الدولار.. يعني العملات الأوروبية استفادت من المخاوف اللي بتحصل في أمريكا.. وده عكس اللي حصل للدولار الكندي مثلاً.. اللي لسه متضرر من مخاطر الرسوم الجمركية

واللي بيقوي الموضوع ده إن المضاربين في السوق.. زي صناديق التحوط ومديري الأصول.. بدأوا يقللوا رهاناتهم على صعود الدولار لسبع أسابيع ورا بعض.. حسب بيانات لجنة تداول العقود الآجلة.. دلوقتي الرهانات على صعود الدولار وصلت 9.7 مليار دولار بس.. نازلة من 34 مليار في يناير! يعني السوق كله بيبص للدولار دلوقتي على إنه مش الملاذ الآمن زي زمان

اللي بيحصل مؤخرا هو تحول كبير في السوق العالمي.. الدولار بيتراجع بسبب فوضى الرسوم الجمركية وضعف التوقعات للاقتصاد الأمريكي.. وأوروبا بترجع بقوة بفضل خططها الجديدة.. "جيه بي مورجان" شافت الصورة دي وقررت تتحرك مع الاتجاه الهابط.. ودي رسالة قوية لكل المستثمرين: "الدولار مش مضمون زي الأول" السؤال دلوقتي.. هل الدولار هيستمر في النزول ولا هيرجع يسترد قوته؟ محدش عارف.. بس اللي أكيد إن السوق دلوقتي مليان مفاجآت.. وكل يوم فيه جديد