مفيش نجاح بيحصل صدفة.. ومفيش مجهود بيروح.. واللى بيزرع خير بيحصد خير.. واللي عملوا المصرفي المخضرم هشام عز العرب فى البنك التجاري الدولي.. هيفضل محفور في ذاكرة القطاع المصرفي.. وممكن كده تعتبره نقطة فاصلة بين الاستسلام والأمل.. بين قيادي عارف قيمة النجاح وبين مسئولين كتير اسهل حاجة يعلقوا فشلهم على غيرهم.. بين شخص وطنى كل همه خدمة اقتصاد بلده.. وبين ناس بيبيعوا الهوا وأهم حاجة مصلحتهم.
ولأن اللى بيزرع خير بيحصد خير.. مكنش غريب أبدا ان فى الوقت اللى البنك التجاري الدولي (CIB) بيحتفل بمرور 50 سنة على تأسيسه، ان هشام عز العرب، رئيس مجلس الإدارة والرئيس التنفيذي، ينور الساحة المصرفية في مصر.. بعد ما تم منحه جائزة الإنجاز مدى الحياة من مؤسسة "جلوبال فاينانس" العالمية.
الجايزة مش بس تكريم لعز العرب ، دي كمان شهادة على نجاح البنك اللي بدأ من الصفر سنة 1975 ولحد ما بقى حاليا عمود من أعمدة الاقتصاد المصري بفضل رؤية وقيادة هشام عز العرب.
هشام عز العرب مش مجرد مصرفي قديم ومخضرم .. لا ده تقدر تقول انه عالم مصري بمعنى الكلمة.. اتخرج من جامعة القاهرة سنة 1977، وبعدها سافر بره، اشتغل في أكبر البنوك العالمية زي "جي بي مورجان" و"دويتشه بنك" و"ميريل لينش" في لندن ونيويورك
بس مهما راح بعيد، قلبه فضل متعلقة في مصر، ورجع سنة 2002 يمسك البنك التجاري الدولي، ومن ساعتها وهو بيحوّله من بنك عادي لرقم مهم فى القطاع الخاص في مصر.. البنك اللي كان سعره في السوق 200 مليون دولار بقى دلوقتي يساوي أكتر من 6 مليار دولار.. وده مش من فراغ .. ده شغل سنين وتعب بجد.
الجايزة دي، اللي تعتبر أعلى حاجة "جلوبال فاينانس" بتديها .. جت في وقتها مع عيد ميلاد البنك الخمسين.. يعني كأنها احتفالية مزدوجة، بهشام وبنجاح البنك مع بعض.
الراجل ده مش بس عبقري في شغله.. لأ.. ده كمان إنسان بمعنى الكلمة.. متواضع وجدع، بيحب بلده من من قليه، وكل اللي بيشتغلوا معاه بيقولوا عليه كده.. في أوقات صعبة، لما البنك كان ممكن يقع، هشام وقف زي الأسد، وطلّعه لبر الأمان، مش بس كده، ده كمان خلّى العالم كله يحترم البنوك المصرية.
اللي يعرف هشام عز العرب عن قرب يقولك إنه راجل بيشتغل بضمير، وكل همه إزاي يخلّي مصر في المقدمة
عزالعرب مش بس مهتم بالارباح ورأس المال .. لأ.. هتلاقيه موجود في الخير كمان.. وهو بيشغل حاليا منصب رئيس مؤسسة CIB اللي بتساعد الأطفال الغلابة في الصحة والتعليم، وده بيوريك إنه مش بس بيفكر في الأرقام، لكن في الناس كمان.
هشام عز العرب مش اسم عادي.. ده رمز لكل مصري بيحلم ينجح ويرفع اسم بلده.. الجايزة دي بتقول للعالم إن المصري لما بيشتغل بقلبه بيوصل للقمة.. وفي الوقت اللي بنحتفل فيه ب30 سنة من شغل البنك التجاري الدولي، هشام هو اللي بيخلّص الصورة.. راجل وطني بجد، بيثبت إن النجاح الحقيقي هو اللي يخدم البلد ويرفع اسمها عالي.
0 تعليق