هو إيه اللي هيحصل للاقتصاد المصري بعد ما صندوق النقد يدينا الشريحة الرابعة من قرض الـ 8 مليار دولار؟.. وهل الفلوس دي هتفرق معانا ولا هتبقى مجرد مسكن مؤقت؟.. والأهم.. الحكومة ناوية تعمل إيه بكل الـ 8 مليار دولار لما تخلص.

النهاردة صندوق النقد الدولي وافق لمصر  بشكل رسمي على صف  الشريحة الرابعة من قرض الـ 8 مليار دولار.. اللي قيمتها 1.2 مليار دولار.. والشريحة هتدخل مصر خلال أيام.

يعني إيه الكلام ده ؟

يعني فيه  فلوس جديدة من العملة الصعبة هتدخل خزينة الدولة.. وده خبر حلو في وقت الاقتصاد محتاج فيه كل جنيه يتحط في مكانه الصح.. الشريحة دي جزء من برنامج بدأناه مع الصندوق في مارس 2024.. وهي الرابعة من 8 شرايح.. يعني لسه فيه 4 جايين في السكة.

طب الفلوس دي هتعمل إيه دلوقتي؟

أول حاجة.. الـ 1.2 مليار دولار هيروحوا يقووا الاحتياطي الأجنبي.. اللي وصل 47.4 مليار دولار.. وده رقم قوي جدًا بيدي البنك المركزي قوة يتحكم بيها في سعر الدولار ويحمي الجنيه من أي هزات.. تاني حاجة.. الفلوس دي هتساعد الحكومة تدفع جزء من التزاماتها الخارجية.. زي الـ 5 مليار دولار اللي لازم تسددهم للصندوق نفسه السنة دي.. وتالت حاجة.. هتبقى زي نفس هوا للحكومة عشان تخفف الضغط على المواطنين شوية.. يعني بدل ما ترفع أسعار الوقود أو الكهرباء دلوقتي.. ممكن تستنى شوية وتدي مساحة للناس تتأقلم.

الجميل بقى إن الصندوق مش بس وافق على الشريحة دي.. لا.. ده كمان قال إن مصر هتحصل على تمويل إضافي بـ 1.3 مليار دولار من صندوق الصلابة والاستدامة.. يعني إجمالي اللي جاي دلوقتي حوالي 2.5 مليار دولار.. ده معناه إن الصندوق شايف إن مصر بتمشي صح في الإصلاحات.. زي تخفيض التضخم اللي نزل لـ 10% في فبراير 2025.. وتحسين الفائض الأولي.. وتقليل الدين الحكومي.. يعني شهادة ثقة كده في الاقتصاد المصري.

طب مصير الشرايح الجاية إيه؟

بص.. البرنامج ده ممتد على 46 شهر.. يعني لسه فيه 4 شرايح قدامنا.. كل واحدة 1.2 مليار دولار.. الشريحة الخامسة متوقعة في منتصف مارس 2025.. بعد المراجعة الخامسة مع الصندوق.. والسادسة في سبتمبر 2025.. والسابعة والتامنة في 2026.. يعني لو حسبناها.. مصر هتكون جابت حوالي 3.6 مليار دولار في 2025.. والباقي في 2026.. وكده نكون خلّصنا الـ 8 مليار دولار كلهم.. بس الموضوع مش مجرد فلوس بتتاخد.. لا.. ده كل شريحة بتيجي بشرط إن الحكومة تكمل الإصلاحات.. زي تحرير سعر الصرف.. وتقليل الدعم تدريجيًا.. وتشجيع القطاع الخاص.

طب الحكومة بتفكر إزاي بعد ما تخلّص القرض؟

هنا بقى الموضوع اللي لازم نركز فيه.. الحكومة عارفة كويس إن الفلوس دي مش حل سحري.. دي زي الدوا اللي بيخفف الألم.. لكن العلاج الحقيقي في الاقتصاد نفسه.. أول حاجة بتفكر فيها هي إنها تستثمر الفلوس دي صح.. يعني تزود الإنتاج المحلي.. سواء في الزراعة أو الصناعة.. عشان نقلل الواردات اللي بتاكل حوالي 70 مليار دولار سنويًا.. تاني حاجة.. بتحاول تجذب استثمارات أجنبية أكتر.. زي الـ 46 مليار دولار اللي دخلوا في 2024.. وده بسبب قرارات زي توحيد سعر الصرف والرخص الذهبية".

كمان.. الحكومة عايزة توصل الاحتياطي الأجنبي لمستوى يغطي أكتر من 8 شهور من الواردات.. وده دلوقتي موجود.. لكن لازم يفضل كده.. وفي نفس الوقت.. بتفكر إزاي توازن بين تقليل الدعم – زي الوقود اللي متفق يترفع كله ديسمبر 2025 – وبين حماية الناس من الغلاء.. يعني مثلاً.. ممكن نشوف حزم اجتماعية جديدة زي اللي حصلت لما خفضوا الفائض الأولي من 4.5% لـ 4% السنة دي.. عشان يدّوا مساحة للدعم.

وبعد ما القرض يخلّص في 2026.. الحكومة ناوية تبني اقتصاد قوي من غير ما تعتمد على قروض زيادة.. ازاي.. بزيادة الصادرات.. وتشجيع السياحة اللي لسه متأثرة بالأوضاع الإقليمية.. وتطوير البنية التحتية عشان تجذب المستثمرين.. الصندوق نفسه متفائل.. بيقول إن الاقتصاد هينمو 3.6% السنة دي.. وهيوصل 4.1% في 2026.. بس التحدي الكبير هيبقى قناة السويس.. اللي إيراداتها لسه نازلة بسبب التوترات في البحر الأحمر.. والديون الخارجية اللي لازم تتظبط.