هي أسعار الشقق والعقارات رايحة على فين، وهل ارتفاع سعر الدولار هيساهم في رفع أسعارها خاصة مع طرح وزارة الإسكان أكبر طرح دلوقتي بواقع 70 آلاف وحدة، ولو حد عايز يشتري شقة ينزل امته؟

دلوقتي، قطاع العقارات في مصر، بيشهد كلام كتير عن حدوث فقاعة عقارية قادمة، واللي هي معناها إن أسعار الوحدات أو الشقق أو الفيلات مرتفع جدا وغير متناسب مع سعر السوق، وده بسبب استمرارية ارتفاع الأسعار وبعدها هبوط سريع في الأسعار.

وفقا للخبراء، فأسعار العقارات في مصر اتضاعفت بشكل كبير، بشكل يفوق القوة الشرائية للمصريين، يعني الشقة اللي من سنتين كان سعرها 2 مليون جنيه وصل سعرها انهاردة 10 مليون، يعني اتضاعف سعر الشقة بمقدار 5 أضعاف، وبيرجع السبب في كده، إن تم التسعير على أن يصل سعر الدولار إلى 100 جنيه، وده ماحصلش لحد دلوقتي.

كمان، طن الحديد سعره اتسعر على ان سعره يوصل 70 ألف جنيه، ولكن اليوم سعر طن الحديد 40 ألف جنيه.

كل ده بجانب ارتفاع أسعار مواد البناء، وسعر الفائدة بيتم حسابه دلوقتي على 30% الحالية في البنك المركزي، ولكن ستنخفض أسعار الفائدة العام الحالي والجاي، يعني مفترض أسعار العقارات تقل.

عشان كده، الخبراء اتوقعوا حدوث فقاعة سعرية خلال العامين الجايين، وهيبدأ كل اللي قام بشراء عقار للاستثمار، في عرضه للبيع، لأن كل العوامل التي تم التسعير من خلالها انخفضت بشكل كبير، ويتبقى بس سعر الفائدة، اللي ممكن جدا تنخفض  السنة الجاية، فلو ناوي تشتري شقة فاستنى شوية لأن متوقع جدا الأسعار تنزل السنة الجاية.