أكد الإعلامي أحمد موسى أن الدولة تولي ملف الصناعة اهتماما كبيرا، مشيرا إلى تصنيع كثير من المنتجات التي كان يتم استيرادها من الخارج.

وقال موسى خلال برنامج "على مسؤوليتي" المذاع على قناة "صدى البلد": "الدولة تعمل على توطين الصناعة وبعد كده مش هنستورد عربية قطر ولا مترو، والنهاردة تم تخصيص أرض في برج العرب عشان المصانع الخاصة بعربيات المترو والقطارات".

وأضاف: "خلال الفترة اللي جاية إن شاء الله بعد العيد هنشهد في مصر مصانعنا الوطنية المصانع المصرية الموجودة في السويس لأول مرة نصنع قضبان السكك الحديدية يبقى أنت النهاردة بتشتغل وإحنا كنا بنستورد كل ده".

وتابع: "حتى الفلنكات بتاعت السكة الحديد كنا بنستوردها والنهاردة بنعملها في مصر، النهاردة بتصنع لأول مرة في مصر وشركاتك الوطنية بمعنى الكلمة قضبان السكك الحديدية وده حدث كبير".

وواصل: "دي حاجات تخليك تبقى أنت ماشي على الطريق الصحيح والا لا، دي صناعة مش أي صناعة، صناعة ثقيلة وتعمل عربيات القطر والمترو ويبقى عندك ومعاك الخبراء يدولك التكنولوجيا والخبرات وبعد كده تشتغل أنت بايديك وبإيدين ولادك وكل ده توفير للدولارات والأهم أوطن الصناعة وتبقي حاجتك عندك وتشتغل وتصنع بنفسك".

وأوضح: "الدولة شغالة على ملف الصناعة ده وبالمناسبة البلد بتحاوط نفسها كل شوية هتلاقوا صناعة طالعة، نعمل في بلدنا إن شاء الله وبإيد ولادنا وبالخبرات المصرية ونوفر حاجتنا ونعمل حاجتنا بأيدينا هناخد وقت اه ولكن المسار بدأناه".

واختتم: "هما بيشوفوا أنك بتعمل نقله في البلد وهو عايز يعطلك شوفوا الانفتاح الهائل على القارة الافريقية والتعاون مع أشقائنا في أفريقيا جزء مهم جدا".