يا ترى ايه اللى هيحصل فى اسعار العربيات الفترة الجاية؟ وليه لو معاك عربية لازم تحافظ عليها وما تفرطش فيها ابدا؟ وهل قرار ترامب بفرض رسوم جمركية على العربيات المصنعة خارج أمريكا ممكن يولع الأسعار من جديد؟

أول حاجة لازم تعرفها .. العربية مش مجرد مواصلة .. دي شريك حياتك .. بتوديك الشغل .. بتروح بيها مشاويرك .. بتسافر بيها مع العيلة .. يعني لو راحت منك أو باظت .. هتحس ان جزء من حياتك اتشل .. والحفاظ عليها مش حاجة صعبة أوي .. غير زيت في وقته .. صيانة دورية .. متعملش فيها قلق على الطريق .. واهم حاجة تكون عينك عليها زي ما بتقول المثل "العين الساهية بتحمي المال" .. ليه؟ .. لأن العربية لو باظت هتكلفك مصاريف صيانة تقيلة .. ولو فكرت تشتري واحدة جديدة .. الدنيا مش ناقصة .. الأسعار بقت نار .. وده اللى هيودينا للنقطة التانية.

من ساعات  الرئيس الأمريكي دونالد ترامب أعلن انه هيفرض رسوم جمركية بنسبة 25% على كل العربيات اللى مش مصنعة في أمريكا .. القرار ده هيبدأ يتنفذ من يوم 2 أبريل .. يعني كام يوم وهتلاقي السوق الأمريكي بيتغير شكله.

طب ايه علاقة ده بينا في مصر؟

العلاقة كبيرة جدًا .. لأن السوق العالمي كله مترابط .. لو الأسعار زادت في أمريكا .. الشركات هتحاول تعوض الخساير دي في أسواق تانية زي عندنا .. يعني العربية اللى كنت بتحلم تشتريها .. ممكن تمنها يقفز آلاف الجنيهات فجأة .. وده بيخليك تفكر مليون مرة قبل ما تهمل العربية اللى معاك.

طب ايه تأثير القرار ده؟

ببساطة .. الرسوم الجمركية الـ 25% دي هتزود تكلفة العربيات المستوردة لأمريكا .. يعني لو شركة زي "فولكس فاجن" أو "هيونداي" كانت بتبيع عربية في أمريكا بـ 30 ألف دولار .. دلوقتي ممكن تمنها يبقى 37 ألف دولار أو أكتر .. والشركات دي مش هتستحمل الخسارة لوحدها .. هترفع الأسعار عالميًا .. وفي نفس الوقت .. مركز أبحاث السيارات في أمريكا قال ان القرار ده ممكن يكلف المستهلكين هناك زيادة بتوصل لآلاف الدولارات على كل عربية جديدة .. وده معناه ان مبيعات العربيات الجديدة هتنزل .. ولو المبيعات نزلت .. الشركات هتقلل الإنتاج .. وبالتالي العربيات المتوفرة في السوق هتبقى أقل .. وكل ده هينعكس علينا هنا في مصر بزيادة الأسعار ونقص المعروض.

نيجي للسؤال المهم .. ايه أنواع العربيات اللى هتتأثر أكتر؟

أول حاجة .. العربيات الأوروبية .. زي "بي إم دبليو" و"مرسيدس" و"فولكس فاجن" .. لأن ألمانيا مثلاً من أكبر موردي العربيات لأمريكا .. ومؤشر الأسهم في أوروبا "ستوكس 600" نزل لأدنى مستوى في أسبوعين النهاردة بسبب تراجع أسهم شركات العربيات .. تاني حاجة .. العربيات الآسيوية زي "تويوتا" و"هيونداي" و"كيا" .. لأن اليابان وكوريا الجنوبية بيصدروا كميات كبيرة لأمريكا .. وتالت حاجة .. العربيات الفاخرة .. زي "أودي" و"فولفو" .. لأن الرسوم هتضرب الأسعار بتاعتهم أكتر بسبب تكلفة الإنتاج العالية أصلا.

طب والعربيات الأمريكية؟

دي هتبقى في الأمان نسبيًا .. شركات زي "فورد" و"جنرال موتورز" لو بتصنع في أمريكا هتستفيد من القرار ده .. لكن المشكلة ان حتى الشركات الأمريكية بتعتمد على قطع غيار مستوردة .. يعني التكلفة هتزيد بردو بس بدرجة أقل .. وفي المكسيك وكندا .. اللى بيصنعوا عربيات كتير لأمريكا .. القرار ده ضربة قوية .. لأن ترامب مهدد يزود الرسوم لو الدول دي حاولت ترد.