سمعت كتير عن البورصة لكن هل فكرت مرة تستثمر فيها ولا خفت من الكلام اللي بيتقال عنها وإنها مغامرة مش محسوبة.. في التقرير دا هنقولك على الاستثمار المضمون والمربح في نفس الوقت بعيد عن الدهب والعقارات.

ناس كتير وخاصة الاشخاص العاديين بيخافوا يستثمروا في  البورصة بسبب الصورة الذهنية عنها في الافلام القديمة وإنها بتخسر الانسان كل ثروته في لحظة ودا مش حقيقي بالمرة لأن البورصة من أفضل وأهم أنوع الاستثمار المضمون واللي بيحقق مكاسب كبيرة بشرط تستثمر صح.

مختصر فكرة الاستثمار في البورصة انك بتشتري أسهم أو سندات في شركات معينة عن طريق شركات أوراق مالية معتمدة وطبعا الشركات دي بتختار ليك اسهم مربحة لأنهم أدر بالسوق والبورصة بتوفر فرصة لتحقيق عوائد مالية مجزية على المدى الطويل.

طيب ايه هي مزايا الاستثمار في البورصة؟
شوف حضرتك أهم ميزة هي إن الاستثمار في الأسهم هيحقق عوائد تفوق اللي بتحققه الاستثمارات التقليدية زي الدهب والعقارات وشهادات الادخار في أغلب الاحيان .. وكمان الاستثمار في البورصة بيوفرك تنويع المحافظ الاستثمارية من خلال الاستثمار في مجموعة متنوعة من الأصول المالية ودا بيقلل المخاطر.

كمان من مزايا تشغيل فلوسك في البورصة هي إن تقدر تشتري وتبيع الأوراق المالية بسهولة ودا بيوفر للمستثمرين سيولة عالية.. وكمان الشركات المدرجة في البورصة بتعمل بشفافية تامة ومتقدرش تتلاعب في قيم الأسهم ثلا مما يوفر للمستثمرين معلومات شفافة حول أدائها المالي.

طيب الاستثمار في البورصة ليه مخاطر؟
شوف اي استثمار بيكون ليه هامش مخاطرة لكن مش بالضرورة هتخسر فلوسك أو ارباحك تقل في العموم وساعات في البورصة بتحصل تقلبات في أسعار الأوراق المالية وفي أوقات البورصة بتتأثر بالأوضاع الاقتصادية العامة زي معدلات التضخم وأسعار الفائدة.

طيب ايه النصايح اللي لازم تعرفها قبل الاستثمار في البورصة؟
أول حاجة لازم تحديد الأهداف الاستثمارية بتاعتك  بوضوح زي تحقيق دخل إضافي أو تكوين ثروة على المدى الطويل وتاني حاجة تنويع المحفظة الاستثمارية على مجموعة متنوعة من الأصول المالية لتقليل المخاطر يعني ماتستثمر في أسهم واحدة وحاول تنوع..

تالت حاجة لازم تعرفها إن الاستثمار في البورصة طويل الاجل  ودا بيديك الفرصة تحقق عوائد أفضل على المدى الطويل.. وأهم حاجة في النصايح هي أنك تستعين بمستشار مالي للحصول على المشورة والتوجيه المناسب.

وبخصوص أنواع الاستثمار في البورصة المصرية فهي كتير ومتعددة زي الأسهم وهي عبارة عن حصص ملكية في الشركات ويمكن تحقق عوائد من خلال توزيعات الأرباح وارتفاع أسعار الأسهم.
تاني حاجة السندات وهي قروض بتقدمها الشركات أو الحكومات للمستثمرين وبتدفع فوايد ثابتة.. أما تالت حاجة فهي صناديق الاستثمار المتداولة واللي بتتبع مؤشر معين زي مؤشر الأسهم أو مؤشر السندات.