ايه اللي بيحصل في العالم والأسواق الدولية بعد قنبلة الرسوم الأمريكية على كل دول العالم وازاي القرارات دي هتغير خريطة القوى الاقتصادية وايه مصير الأسواق العالمية والمحلية.
من ساعات الرئيس الأمريكي ترامب نفذ تهديداته بفرض رسوم جمركية على كل العالم اللي بيصدر لأمريكا بنسب متفاوتة بيتتراوح بين 45 و10% ومن ساعة صدور القرارات الأمريكية وحصل زي تسونامي في الأسواق العالمية وحتى في الشركات الأمريكية الكبرى اللي نزلت أسهمها بعد القرارات الأخيرة لإدارة ترامب.
طيب ترامب بيعمل كده ليه ؟
الاداره الامريكيه الحاليه شايفة إن كل دول العالم بتستفيد من الأسواق الأمريكية وبالتالي لازم تدفع الاتاوة واللي مش عاجبه يخبط دماغه في الحيط وترامب متوقع تحقيق 700 مليار دولار سنويا من الرسوم دي هيخفض بيها الدين الأمريكي ويخفف الضغط على دافعي الضرائب من الأمريكيين.
ياترى إيه تأثير دا على الأسواق العالمية والتجارة الدولية ؟
طبعا قرارات ترامب الأخيرة عملت هزة ضخمة في كل الأسواق العالمية ودا غير أنه ضرب مسمار في نعش اتفاقيات التجارة الحرة اللي العالم كله بيحتكم ليه ودا هيخلق صراعات تجارية دولية وحروب اقتصادية وخلل في النظام العالمي والمالي كله وهيكون ليها تأثير كبير على كل دول العالم وكمان هتخلق تحالفات اقتصادية جديدة بين دول العالم وخاصة الاقتصاديات المتقدمة زي أوربا والصين والهند واليابان ودول شرق آسيا.
فرض رسوم جمركية بدون وجه حق أو اي إجراءات حمائية من جانب واحد بيعتبر نوع من العقوبات الاقتصادية على العالم كله وبتعارض النظام المالي والعالمي واتفاقيات التجارة الحرة .. كمان الإجراءات الانتقامية اللي أصدرها ترامب هتستدعي الرد من دول تانية كتير خاصه الدول الكبرى ودا هيكون ليه تأثير سلبي على ارتفاع الأسعار والتضخم في العالم كله وفي نفس الوقت ترامب أعلن عن فتح باب التفاوض مع الدول المتضررة كأسلوب للحصول على مزايا مالية أو تجارية يعني زي ما وصفوها في الغرب بلطجة اقتصادية أمريكية وابتزاز تجاري فج.
وعلى المدى المتوسط والطويل القرارات الأمريكية بداية لنهاية سيطرتها على العالم اقتصاديا ودي رأي أغلب علماء الاقتصاد في العالم واللي شايفين ان العقوبات الامريكيه هتخلق كيانات اقتصادية اكبر وهتنهي حالة الخصام الاقتصادي التاريخي بين الصين ومعاها دول آسيا وبين الاقتصاديات الغربية في أوربا ودا مش في صالح الهيمنة الأمريكية.
وعلى صعيد الأسواق فمتوقع ارتفاع أسعار الدهب والمعادن والسلع والنفط نتيجة الإجراءات العقابية الأمريكية ومصر مش هتكون بعيدا في حالة ارتفاع الأسعار لأنها جزء من النظام العالمي وفرض رسوم على صادراتها حتى لو كانت الحد الأدنى وهي 10% فدا هيسبب زيادة في تكلفة الإنتاج والتصدير.
0 تعليق