يا ترى ايه سر قرارات السيسي الأخيرة ؟ وليه الرئيس قرر يتدخل بنفسه لاصلاح الوضع الاقتصادي في مصر؟ إيه اللي بيراهن عليه السيسي في قرارات زي توحيد الضريبة وتقليص زمن الإفراج الجمركي؟

فيه تحركات اقتصادية قوية بيقودها الرئيس عبد الفتاح السيسي .. في الأيام اللي فاتت .. الرئيس  أصدر توجيهات واضحة وجريئة .. زي توحيد الضريبة واستبدال الرسوم الكتير اللي بتدفعها الشركات بضريبة واحدة على صافي الأرباح .. وكمان تقليص زمن الإفراج الجمركي من 8 أيام لـ 6 أيام .. وفيه خطة إنه يوصل ليومين بس بحلول نهاية 2025.

طيب .. إيه الهدف من القرارات دي؟ وإزاي هتأثر على المستثمرين والاقتصاد المصري؟

أول حاجة .. خلينا نفهم إيه اللي بيحصل في توحيد الضريبة .. دلوقتي الشركات في مصر بتدفع رسوم كتير جدًا لجهات وهيئات مختلفة .. كل جهة عايزة حصتها .. وده بيخلّي المستثمر يحس إنه في متاهة .. السيسي قرر يلغي العشرات من الرسوم دي .. ويحط بدالها ضريبة إضافية موحدة تتحسب على صافي الأرباح .. يعني إنت كمستثمر مش هتدفع رسوم ثابتة حتى لو ما حققتش أرباح .. لا .. هتدفع بناءً على اللي كسبته فعلاً .. وده بيحقق العدالة الضريبية .. وبيخفف الأعباء المالية على الشركات .. خصوصًا الشركات الناشئة والصغيرة اللي بتبقى لسه بتدور على رجلها في السوق.

القرار ده مش بس كده .. ده كمان بييجي مع خطوة تانية مهمة .. وهي تدشين منصة موحدة للكيانات الاقتصادية .. يعني بدل ما تدور على 10 مكاتب وتخلّص أوراق في كل حتة .. هتبقى فيه منصة واحدة تخلّص منها كل إجراءاتك .. وده بيسرّع عملية تأسيس الشركات وتشغيلها .. وكمان بيخلّي المناخ الاستثماري أكتر شفافية .. وحسب تصريحات المهندس بسام الشنواني رئيس الجمعية المصرية لشباب الأعمال .. القرار ده هيساعد على جذب استثمارات محلية وأجنبية .. وهيخلّي مصر منافس قوي زي الإمارات والسعودية في جذب رؤوس الأموال.

نيجي بقى لموضوع الإفراج الجمركي .. اللي بيعتبر عصب التجارة الخارجية .. السيسي وجه بتقليص زمن الإفراج الجمركي من 8 أيام لـ 6 أيام .. وفيه خطة طموحة إنه يوصل ليومين بس بنهاية 2025 .. وده مش كلام في الهوا .. وزير الاستثمار حسن الخطيب قال إن الخطة دي هتتعمل على مرحلتين .. الأولى هتخلّي الإفراج في 4 أيام .. والتانية هتوصله ليومين .. وكمان فيه قرارات زي إن الخدمات الجمركية تشتغل في العطلات الرسمية ويوم الجمعة .. وإمكانية دفع الرسوم بعد ساعات العمل البنكية .. كل ده عشان يسهّل عملية الاستيراد والتصدير .. ويقلّل التكاليف اللوجستية على المستوردين والمصدرين.

طيب .. إيه اللي بيراهن عليه السيسي في القرارات دي؟

ببساطة .. السيسي بيراهن على إن مصر لازم تبقى مركز استثماري وتجاري عالمي .. هو شايف إن الاقتصاد المصري عنده إمكانيات ضخمة .. بس محتاج بيئة أعمال مرنة وشفافة .. القرارات دي هدفها تخلّي مصر أكتر تنافسية .. يعني المستثمر الأجنبي لما ييجي يقارن بين مصر ودول تانية .. يلاقي إن مصر فيها إجراءات أسهل .. وضرائب أقل .. وتكاليف تشغيل أوفر .. وده اللي هيجذب الاستثمارات اللي بتخلّق فرص شغل وتزود الناتج المحلي.

كمان .. السيسي بيراهن على القطاع الخاص .. عايز القطاع الخاص يبقى المحرك الأساسي للاقتصاد .. مش الحكومة .. عشان كده بيحط حوافز زي الضريبة الموحدة والرخصة الذهبية وتوفير الأراضي الصناعية .. وده بيتماشى مع رؤية مصر 2030 اللي بتهدف تحول الاقتصاد المصري لاقتصاد إنتاجي تنافسي .. مش استهلاكي بس.

بس فيه نقطة مهمة .. بعض الناس بيقلقوا .. بيقولوا: “طب ما الضريبة الموحدة دي ممكن تبقى أغلى من الرسوم القديمة؟” .. وده سؤال مشروع .. لكن حسب تصريحات مسئولين زي أحمد كجوك وزير المالية .. الهدف هو تخفيف الأعباء مش زيادتها .. والضريبة هتتحسب بناءً على الأرباح الحقيقية .. يعني لو الشركة ما حققتش أرباح .. مش هتدفع .. وكمان الشفافية في التحصيل هتقلل من التهرب الضريبي وهتخلّي السوق أكتر عدالة.