نفسك تشترى شقة  ومش عارف الدنيا رايحة على فين ؟ عاوز تعرف اسعار الشقق هتزيد ولا لأ ولو هتزيد هتزيد بنسبة كام.. يبفى لازم تقرأ الكلام  ده

خلينا نبدأ بأول حاجة ايه العوامل اللي بتأثر على أسعار العقارات؟

واحدة من أهم العوامل اللي هتأثر في السوق هي التوترات الجيوسياسية اللي بنشوفها حوالينا في المنطقة يعني مع زيادة التوترات سلاسل الإمداد بتبقى في ضغط أكتر.. وده بينعكس على تكاليف المواد اللي بتستخدم في البناء زي الحديد والأسمنت اللي أسعاره بقت نار

رئيس غرفة التطوير العقاري باتحاد الصناعات المصرية طارق شكري وضح إننا ممكن نشوف زيادة بين 10% لـ 15% في أسعار الوحدات خلال السنة الجاية. . وده ناتج عن زيادة أسعار المحروقات محلياً اللي هتأثر على كل جوانب القطاع.. يعني بالبلدي كده كل حاجة بقت تكلف أكتر والزيادة دي بتترجم مباشرة لزيادة في أسعار العقارات

طب إيه تاني بيأثر على الأسعار؟

في عامل مهم تاني وهو التدفقات الأجنبية والاستثمارات الإقليمية في كلام عن صفقات إقليمية كبرى في القطاع العقاري المصري هينك الاعلان عنها قريب.. الصفقات دي لو حصلت فعلاً هتزود تدفقات العملة الصعبة لمصر واللي هيخفف الضغط على الجنيه شوية لكن فى نفس الوقت هيعمل حركة جديدة في السوق العقاري ويدفع الأسعار لأعلى بسبب الطلب المتزايد

كمان لو نفتكر أسعار العقارات كانت زادت حوالي 200% في 2023 بعد اضطرابات سعر صرف الجنيه مقابل الدولار.. والأسعار بعد كده هديت شوية لما حصل تعويم للجنيه وبدأت العملة الصعبة ترجع للبلد لكن مافيش ضمان إن الهدوء ده يستمر وده بيرفع توقعات إنه مع أول اضطراب جديد ممكن الأسعار تقفز تاني

وليه الخبراء بيقولوا إن الزيادة مستمرة؟

الخبراء بيشوفوا إن الطلب على العقارات في مصر مستمر وقوي خصوصا في المدن الجديدة والمناطق اللي فيها توسعات عمرانية.. ودي بقت فرصة كبيرة للمستثمرين سواء مصريين أو أجانب اللي عاوزين يستثمروا في بلد فيه معدل نمو سكاني مرتفع والطلب على السكن فيه دايما موجود

وما بين الوضع الاقتصادي والتوترات السياسية واحتياج السوق الدائم كل العوامل دي بتخلي الخبراء متوقعين إن أسعار العقارات هتفضل في ارتفاع خلال 2025.