ايه اللي بيحصل في سوق الدهب اليومين دول.. وياترى الأسعار هترجع تزيد ولا الهبوط هيستمر.. وايه اشتري دهب في الغلاء هيعمل إيه.

سوق الدهب سواء في مصر أو العالم بيعيش حالة ترقب وضبابية من ساعة قرارات ترامب اللي قلبت العالم وخلت البنوك المركزية والشركات تجري على الملاذ الآمن عشان تتحوط ضد الازمات ودي وظيفة الدهب وقت الأزمات الكبيرة .. وبجانب قرارات ترامب كانت فيه أسباب تانية وراء ارتفاع اسعار الدهب بشكل قياسي منها استمرار الحرب في أوكرانيا والصراع في الشرق الاوسط.

طيب ايه اللي بيحصل دلوقتي في السوق؟
كلنا ملاحظين إن اسعار الدهب بتنزل بشكل مستمر والنهاردة عيار 21 سجل 4,755 جنيه للبيع ودا من أعلى سعر وصل ليه واللي تخطي ال5 الاف جنيه بالمصنعية والتوقعات بتقول إن الدهب هيستمر في النزول الفترة لجاية ودا لأسباب كتير وهي قرب التوصل لاتفاق بين الولايات المتحدة والصين وهدوء الحرب التجارية بينهم ودا خلق نوع من الاستقرار في الاسواق الدولية واتجهت بنوك مركزية لبيع الفائض من احتياطي الدهب ودا زود المعروض في الأسواق وكمان فيه أخبار مبشرة على اقتراب انهاء الصراعات في الشرق الاوسط وهدنة في روسيا وكل دا بيزيل اسباب زيادة أسعار الذهب.

" title="الدهب نازل ويحير اللي اشتري هيعمل إيه" frameborder="0">

طيب الاسعار رايحة على فين في مصر؟
الصاغة المصرية مرتبطة بشكل طبيعي بالاسواق العالمية وبسعر الدولار في مصر لأن جزء كبير من الدهب بيستورد من السوق العالمي ولما الاسعار تنزل بره فهي طبيعي بتنزل في مصر ودا اللي حاصل اليومين اللي فاتو بجانب إن الطلب على الدهب بيقل لما تحصل موجة هبوط عشان الناس بتستني ينزل أكتر.. لكن خبراء الصاغة شايفين إن دا الوقت المناسب لشراء الدهب وتخزينه.

طيب بالنسبة للناس للي اشترت تعمل إيه؟
كل اللي اشترى دهب بغرض الاستثمار فهو مش خسران حاجة وادا لأن الدهب استثمار طويل الاجل يعني مش اقل من 5 سنين وطبيعي الدهب سعره بيزيد دايما وبشكل طبيعي لأنه معدن نادر وبيعتير نقد في الاحتياطيات الدولية وملاذ امن لحفظ قيمة الأموال واللي اشترى الدهب في ذروة ارتفاع الاسعار هيرجع يكسب فيه تاني لأنه بعد فترة هيزيد.. كمان فيه احتمال ان الاسعار العالمية ترجع تولع تاني ودا مرهون بطبيعة الصراعات التجارية اللي ممكن تحصل في المستقبل وخاصة في وجود رئيس أمريكي مشهور بسياسته العنترية وتهوره.