مصر لقت مغارة علي بابا من الإسكان واللي تحول لمصدر لأهم مصادر من مصادر الدخل الدولاري لمصر.. ياتري مصر بتتحرك ازاي في ملف الاسكان.. ومستهدفات مصر من الاستثمارات العقارية هتوصل لكام.
الحكومة عندها خطة في الفترة الرئاسية الجديدة أنها تحول كل قطاعات الدولة لمصادر اضافية للدخل الدولاري في الناتج القومي المصري، وده اللي بدات الحكومة تنفذه في قطاع الاسكان واللي تحول في الوقت الحالي لواحد من اهم مصادر الدخل الدولاري لمصر من الخارج، ده غير أن الحكومة استهدفت من خلاله حل مشكلة الفقاعة العقارية اللي بيعاني منها سوق العقارات في مصر، خصوصا ان مصر عندها ثروة عقارية كبيرة بفضل الجهود الكبيرة اللي قامت بيها الحكومة لتدشين المدن الجديدة في كل محافظات الجمهورية.
طيب ازاي الحكومة حولت قطاع العقارات لمصدر من مصادر الدخل الدولار لمصر من الخارج؟.
في الفترة اللي فاتت الحكومة أطلقت اكثر من مبادرة هدفها زيادة الايرادات الدولارية اهمهم مبادرة بيت الوطن ودي مبادرة مخصصة للعاملين المصريين بالخارج واللي الدولة طرحت المرحلة العاشرة منها، وبسبب الاقبال الكبير عليها الحكومة قررت زيادة عدد قطع الأراضي المطروحة في المبادرة لتلبية احتياجات المواطنين والطلب المتزايد على الشراء، ووصل اجمالي الايرادات اللي حققتها الحكومة من المبادرة لـ 10 مليار دولار حتى الان.
الجهود اللي بتقوم بيها الحكومة لتسويق العقار المصري في الخارج متوقفتش علي كده لا ده كمان الحكومة شكلت لجنة برئاسة الدكتور خالد عبد الغفار، نائب رئيس مجلس الوزراء للتنمية البشرية، وزير الصحة والسكان، وهدفها تيسير دخول الماركات العالمية لمصر، وجذب المزيد من أعداد السائحين الوافدين إلى مصر.
وعلشان الحكومة تواصل خطتها للتوسع في تصدير العقار، الدكتور مصطفي مدبولي رئيس مجلس الوزراء عقد اجتماع مع اللجنة الاستشارية للتنمية العمرانية وتصدير العقار، للاستماع لرؤيهم ومقترحاتهم بما يسهم في دفع العمل في القطاعات المختلفة، ورئيس مجلس الوزراء أكد استعداد الحكومة الاستماع لكل التوصيات والمخرجات اللي بيتم طرحها خلال اجتماعات اللجان الاستشارية وهيتم التعامل معاها بكل جدية سواء من الحكومة أو البرلمان لاقرار التشريعات اللازمة واللي كان اخرها اقرار قانون الرقم القومي للعقارن والحكومة حاليا بتستعد لانشاء منصة عقارية الهدف منها الترويج لمختلف المنتجات العقارية سواء للمصريين في الداخل والخارج أو للأجانب.
الحكومة حاليا شغالة وبكل قوة علي الترويج للمواقع العمرانية الجديدة من خلال المستثمرين العقاريين خصوصا في الساحل الشمالي واللي بتتميز بمقومات فريدة ملهاش مثيل زيها في العالم كله سواء من حيث المناخ أو الشواطئ والرمال المتميزة، ده غير الفعاليات الترفيهية والاحتفالات الكبيرة اللي قامت بيها الحكومة خلال الفترة اللي فاتت واللي ساهمت في زيادة عوامل الجذب علي الساحل الشمالي، ده غير الاجراءات اللي قامت بيها الحكومة لتسهيل دخول وخروج السائحين وتبسيط إجراءات اصدار التأشيرات، وتطوير المطارات بالمنطقة وسرعة إقرار التسجيل المبدئي للعقارات خصوصا للأجانب.
0 تعليق