تفتكروا ليه تحويلات المصريين من بره زادت أوي فى الفترة الأخيرة ؟ إزاي الفلوس اللي بيبعتها المغتربين بقيت كارت قوي جدًا في الأزمة الاقتصادية اللي بنمر بيها؟ وهل التحويلات دي قادرة فعلًا تخفف من أزمة نقص الدولار؟ ويا ترى ليها تأثير مباشر على سعر الصرف؟

فى الفيديو ده هنتكلم عن ملف بقى مهم جدًا، وخصوصًا بعد ما شفنا ارتفاع كبير في تحويلات المصريين اللي بيشتغلوا بره .. الأرقام بتقول إن التحويلات ارتفعت في أول 8 شهور من 2024 بنسبة 36.4%، ووصلت لـ 18.1 مليار دولار مقارنةً بـ 13.3 مليار دولار في نفس الفترة من 2023.. يعني بنشوف زيادة ضخمة ومستمرة.. وده لسه مش نهاية القصة.. لأن في أغسطس بس التحويلات كانت 2.6 مليار دولار مقابل 1.6 مليار دولار في نفس الشهر السنة اللي فاتت

طب إيه أهمية الأرقام دي؟

أول حاجة تحويلات المصريين بالخارج دي بتمثّل واحدة من أهم مصادر الدخل للدولة من العملة الصعبة خصوصًا مع الظروف الاقتصادية اللي بتخلّي توفر الدولار شحيح جدًا..و التحويلات دي بتمثل تقريبًا المصدر الأول للدخل من بره بعد عائدات قناة السويس.. ولما الأرقام بتزيد بالشكل ده.. ده بيساهم بشكل مباشر في زيادة الاحتياطي النقدي الأجنبي وده طبعًا بيدي للبنك المركزي قدرة على إدارة الأزمة الاقتصادية بشكل أحسن وبيخفف من الضغط على الجنيه المصري

واللي كتير ممكن ما يعرفوش إن الزيادة دي في التحويلات بتأثر مباشرة على سعر صرف الدولار في البنوك وشركات الصرافة.. لأن لما الدولار بيبقى متوفر أكتر بسبب التحويلات ده بيساعد شوية في استقرار السعر أو على الأقل يبطّئ من ارتفاعه.. و في الفترات اللي الدولار فيها كان قليل كتير من المصريين المغتربين كانوا بيروحوا للسوق السودا عشان يبيعوا الدولار بسعر أعلى لكن لما بنشوف إن التحويلات بترتفع بالشكل ده، ده ممكن يخلّي السوق السودا ميبقاش عندها تأثير قوي زي الأول

نيجي للسؤال المهم، ليه التحويلات زادت بالشكل ده؟ هل ده سببه إن المصريين في الخارج نفسهم بقوا أكتر حرص إنهم يبعتوا لأهلهم في مصر في ظل الظروف الاقتصادية اللي مش سهلة دي؟ ولا يمكن عشان في سياسات أو تسهيلات جديدة من البنوك اللي خلت المصريين بره يفضلوا يحوّلوا فلوسهم عبر القنوات الرسمية؟ ممكن برضه يكون بسبب مبادرات وتحفيزات بتقدمها الحكومة للحد من السوق السودا عشان الناس تفضل الطرق الرسمية

طب هل التحويلات هتفضل في ارتفاعها بالشكل ده في الفترة الجاية؟

الموضوع مش بسيط فيه عوامل كتير ممكن تأثر على الاستمرارية دي منها مثلًا استقرار الاقتصاد المصري وسياسات البنوك وسعر الدولار عالميًا والظروف الاقتصادية للمصريين في الخارج.. بس اللي واضح لحد دلوقتي إن التحويلات بتمثل شريان مهم جدًا للاقتصاد المصري وبتلعب دور كبير في دعم احتياطي النقد الأجنبي وممكن تساعد في استقرار سعر الصرف لو فضلت بالشكل ده

الخلاصة.. لازم نفتكر إن تحويلات المصريين بالخارج مش مجرد فلوس بيدوها لأهلهم دي بقت جزء أساسي من قدرة البلد إنها تواجه تحديات كبيرة وده بيخلّي دور كل مغترب مصري مهم لأن بيساهم في دعم الاقتصاد بشكل مباشر