مصر في الفترة اللي فاتت كانت حرفيا متعثرة في قطاع الصناعة، بعد ما تشكيل الحكومة الجديدة حصلت تطورات هتغير خريطة الصناعة في مصر تماما، ياتري اية هيا التطورات دي.. واية هيا خطة الحكومة لعودة احياء قطاع الصناعة

عشان يبقي متفقين قبل شهر مارس 2024، مصر كانت بتعاني اقتصاديا والفضل في ده يرجع للسوق السودا في التجارة بالعملات الأجنبية واللي كانت خلاص عبارة عن شبح بيهدد الاقتصاد المصري بشكل كامل، ولولا القرار اللي جه في وقته بتحرير سعر صرف الجنية المصري بشكل كامل قدام العملات الاجنبية كانت الاوضاع هتكون مختلفة تماما عن الوضع اللي موجودة عليها دولوقتي.

طيب اية اللي كان بيحصل في مصر وسببب أزمة توقف عدد كبير من المشروعات؟.
الفترة اللي كانت قبل قرار الاصلاح الاقتصادي واللي قامت بيها الحكومة وتحديدا في شهر مارس 2024، واللي كانت السوق السودا شادة علي اخرها واللي كانت متحكمة في كل حاجة في البلد، وتحديدا الاسعار.. وواحد من الاسعار اللي كانت السوق السودا متحكمة فيها بدرجة كبيرة هيا اسعار المواد الخام واللي كانت كل يوم بسعر جديد، وطبعا السعر بتاع بكرة هيكون اعلي بكتير من سعر النهاردة، وبالتالي كان السوق المصري غير مستقر تماما وده حاجة اساسية علشان تخلي اي مستثمر يفكر مليون مرة قبل ما يدخل اي بلد علشان يبني منشاة صناعية أو يعمل مصنع يوفر فرص عمل لآلاف الشباب ويكون سبب اساسي في زيادة حصة الدولة التصديرية.
الاسعار المتغيرة وعدم توفير الدولار للمستوررين وعدم الاستقرار اللي كان موجود في السوق المصري خلي مصر بالنسبة للمستثمرين بلد طاردة لاي استثمار وده فعلا اللي حصل خصوصا ان عدد كبير من المصانع اللي كانت شغالة وبتمارس عملها بشكل يومي توقف تماما، وده اللي خلي مصر بقي موجود فيها 12 الف مصنع متوقف عن العمل .
طيب اية اللي عملته الحكومة علشان تعيد تشغيل المصانع دي ؟.
ملف المصانع المتعثرة واحد من الملفات الشائكة اللى الحكومة حطتها علي أولوية أجندتها الاقتصادية، وتم اصدار تكليفات مباشرة للفريق كامل الوزير نائب رئيس مجلس الوزراء للتنمية الصناعية ووزير الصناعة والنقل بضرورة وجود خطوات مباشرة لحل مشاكل المصانع المتعثرة، وفعلا الحكومة بدأت في عمل حصر لكل المصانع اللي متوقفة عن العمل،.
بعد ما الحكومة عملت حصر للمصانع اللي توقفت عن العمل ووصل العدد ل12 ألف مصنع طرحت الدولة اكثر من مبادرة من خلال البنك المركزي لتمويل المشروعات بروؤس اموال كبيرة لاعادة احياء المصانع المتوقفة عن العمل، ومن خلالها تم ضخ كميات كبيرة من الفلوس لتشغيل المصانع المتوقفة عن العمل.
مش كده بس، لا ده الحكومة طرحت كمان اكثر من مباردة لمساعدة المصانع المتوقفة لاعادة تعريف منتجاتها للمواطن المصري زي مبادرة أبدأ واللي بتستهدف اعادة تعريف المواطن والمستهلك الخارجي بالمنتجات المصرية ومدي جودتها وامكانية تصديرها، وكمان بيعرف الحكومة المشاكل اللي موجودة في قطاع الصناعة علشان يكون في خطط لحلها.