لو معاك دهب أو الماظ أو فلوس أو تحويشة العمر وخايف عليها من السرقة وشايلهم تحت المخدة وليل نهار قلقان عليهم يبقي الحل ده ليك، خصوصا اني هقولك علي مكان هتشيلهم فيه بكل أمان وبدون ما تخاف عليهم وهتكون متاكد أنه مش هينقص منهم قرش واحد.. لو عايز تعرف ده هيكون ازاي وفين شوف التقرير  ده للآخر

الفترة الحالية في مخاوف كبيرة جدا عند كتير مننا من فتح مشروعات بسبب التقلبات السعرية اللي موجودة في البلد، وبقي فيه نسبة مخاطرة خصوصا أن اسعار المواد الخام كل يوم في سعر جديد..

المخاوف دي خلت ناس كتيرة تفكر في طريقة مختلفة علشان يحافظوا بيها علي فلوسهم منهم اللي احتفظ بيهم في الاستثمار الآمن عن طريق شراء الدهب واللي حاليا عليه اقبال كبير جدا وبالتالي سعره كل يوم في الطالع والاسعار في خلال الكام شهر اللي فاتوا ارتفعت لارقام موصلتش لها قبل كده.

طيب اية الحل مع الناس اللي عندها خوف من كل مجالات الاستثمار؟.
لو عندك قرشين وخايف تدخل بيهم مشروع وخايف من الاسعار، يبقي الحل الافضل لك أنك تأجر خزينة في بنك، وفيها هتقدر تشيل فيها اي حاجة انت عايزها سواء كانت فلوس أو دهب أو مرجان أو ياقوت أو اي حاجة في دماغك.

طيب مصاريف تأجير الخزينة دي بتوصل لكام؟.
بنك البركة بيعتبر من اقل البنوك حصولا علي عائدات لتأجير الخزن للمواطنين واللي اعلن عن طرح خزن حديدية للأمانات بواقع 200 جنيه سنويا للصندوق صغير الحجم، وفي بنوك كتيرة أعلنت عن اسعار تاجير الخزن زي البنك المصرى لتنمية الصادرات وبنك قناة السويس وبنك أبوظبي الإسلامي،  واللي اعلنوا عن تحديد 500 جنيه سنويا لتاجير الخزن للمواطنين .

من بنك البركة نروح معاكم لبنك مصر واللي اشترط ضرورة فتح شهادة أو وديعة أو حساب بنكي بقيمة 5000 جنيه، لاي مواطن عايز يأجر خزينة في البنك علشان يشيل فيها فلوسه ويحفظ أي حاجة مهمة عنده، والبنك قال أنه يمكن للمواطن أن يسترد الشهادة أو الوديعة أو الحساب الموجود له في البنك في نهاية المدة، وكمان اشترط فتح حساب جاري أو توفير بقيمة 500 ألف جنيه.

طيب هل تأجير الخزن مهم قوي للدرجة دي علشان البنوك تشترط فتح حسابات أو شراء شهادات علشان تأجر خزن للمواطنين ؟.

الخزن اللي موجودة في البنوك بقت في الوقت الحالي بقت مكان مثالي لحفظ الدهب والممتلكات الثمينة وبتتميز بضمان السرية والخصوصية التامة، مقابل مصاريف سنوية قابلة للتجديد وده في كل البنوك باستثناء البنك الأهلي المصري وبنك مصر واللي بيتحوا إمكانية الدفع شهريًا أو سنويًا.

البنوك أعلنت علي مواقعها الالكترونية تأجير الخزن بشوية شروط بسيطة أولهم ان العميل اللي عايز يفتح الخزينة لازم يبقي هو اللي موجودة وحاضر، علشان يستلم الخزينة ويستلم المفاتيح بتاعتها، والمفاتيح بتاع الخزينة بيكونوا مفتاحين واحد بيكون مع العميل والثاني مع البنك .