عمرك فكرت قبل كده إن البنوك ممكن تقدم لك حاجات أهم من القروض؟ طب تعرف إن البنوك بقت بتقدم خدمات استشارية، وتدعمك كمستشار مالي؟
طيب إيه رأيك لو عرفت إنهم كمان بيساعدوك في استخراج التراخيص، وفي دراسات الجدوى، وكمان في التسويق وتطوير الأفكار الجديدة؟.. إيه ده! ده البنك بقى شريكك في كل خطوة في مشروعك، مش مجرد مكان بتودع فيه فلوسك.. الحقيقة إن في خدمات تانية كتير البنوك بتقدمها .. خدمات ممكن تغير مفهومك عن البنك تمامًا

تعالوا نبدأ من الأول.. دلوقتي كتير من البنوك بتدعم المشروعات الصغيرة والمتوسطة بطريقة أكبر من مجرد تقديم القروض! يعني البنك بيساعدك تخطط وتبدأ صح من أول خطوة. وده جزء من خطة الدولة لدعم الشمول المالي وتحويل الاقتصاد من غير رسمي لرسمي.. وواحدة من أهم الخدمات غير المالية هي دراسات الجدوى.. البنك بيساعدك تعمل دراسة جدوى لمشروعك عشان تتأكد من إن فكرتك مربحة وقابلة للتنفيذ، وده شيء مهم لأي مشروع جديد عايز ينجح ويستمر. مش بس كده البنوك كمان بتهتم بتطويرك من جوانب تانية زي تصميم المنتج وتسويقه، وحتى بناء هيكل إداري واضح لمشروعك عشان تدير الأمور بسهولة واحترافية.

طب لو مشروعك لسه في مرحلة البداية؟

البنوك بتقدم لك برامج تدريبية مخصوصة، بيكون فيها خبراء بيدربوك على أساسيات العمل الحر وإدارة المشاريع، مش بس بتتعلم، لكن كمان بيجهزوك لمواجهة تحديات السوق الفعلية. والشباب بقى ليهم نصيب كبير في البرامج دي، خصوصًا من خلال ندوات وجلسات توعية بالجامعات والمعاهد

ولإنه فعلاً مهم يكون عندك كل الأوراق الرسمية لمشروعك، البنوك بتوفر لك خدمات تخليص الأوراق زي البطاقة الضريبية والسجل التجاري، وكل ده تحت خدمة الشباك الواحد! يعني مش هتضطر تلف كتير، هتلاقي كل الأوراق جاهزة

البنوك مش بس بتدعم المشاريع القائمة، لكن بتوفر كمان حاضنات أعمال، دي بتساعد أي حد عنده فكرة مبتكرة إنه يبدأ ينفذها فعلاً، مش بس بيبدأ.. ده بيكون عنده فرصة يتوسع ويشارك كمان في معارض سواء داخل مصر أو بره، عشان يسوّق منتجه ويلاقي له مكان في السوق

وفيه كمان دعم تاني يمكن ناس كتير متعرفش عنه، البنوك بتساعدك في عمليات التجارة الخارجية، تمويل الصفقات وتسهيل الاستيراد والتصدير، وبكده بتدعم أي حد عنده طموح في التوسع برا السوق المحلي. ومش بس كده، البنوك بتقدم خدمات خاصة بعمليات الاندماج والاستحواذ، وده شيء مهم جدًا لو عايز تكبر مشروعك وتوسع نشاطك بشكل احترافي

ما ننساش دعم كبار السن وذوي الاحتياجات الخاصة.. البنوك بقت بتقدم لهم خدمات متكاملة، عشان يقدروا يدخلوا سوق العمل الحر ويديروا مشروعاتهم بكل سهولة

يعني بالمختصر.. البنك دلوقتي بقى شريكك، مش مجرد مكان بتحط فيه فلوسك.. كل الخدمات دي موجودة لدعمك ودعم مشروعك، عشان تبدأ قوي وتكبر صح البنك بقى معاك في كل خطوة، من الفكرة لحد التنفيذ، من أول المشورة لدعم نجاح مشروعك